بعد زواج 40سنه
صرخ حسن متلعثماً: “كدب! ده تزوير! وباقي الثروة؟! الشركة والفلوس والعمارات؟!”
تقدم كمال ووضع اللاب توب على طاولة السفرة، ووصله بشاشة التلفزيون الضخمة في الصالة، وبضغطة زر واحدة.. ظهر وجه مختار رحمه الله!
كان وجهه شاحباً قليلاً من المرض، لكن عينيه كانتا تفيضان بالقوة والهيبة والصرامة التي عرفها الجميع طوال حياته.
جلس الجميع كأن على رؤوسهم الطير، وانحبست الأنفاس حين انطلق صوت مختار يملأ أركان الڤيلا:
”السلام عليكم ورحمة الله وبركاته..
أنا بسجل الفيديو ده قبل وفاتي بأسابيع قليلة، بكامل قواي العقلية وبحضور محاميّ الخاص كمال، وبشهادة الأطباء اللي أكدوا سلامة إدراكي..
الفيديو ده موجه ليك يا حسن، وليكي يا نهى، وليك يا محمود إنت ومراتك سناء..
أنا سمعتكم.. سمعتكم وأنا نايم على سريري اللي كنتوا فاكرينه سرير موتي، وسمعت خطتكم عشان تحجروا عليا وتطردوا صفية في الشارع!
كنت بتمنى من ربنا.. بتمنى وأنا بدعي في جوف الليل، إن بعد ما الوصية الكدابة تتقري، إن ابني حسن ييجي يقف قدام أمه ويقولها: ‘يا أمي فداكي روحي وفلوسي، والبيت بيتك’.. كنت بتمنى بنتي نهى تطبطب عليها ومتهينهاش..
بس أنتم اخترتوا الدنيا، واخترتوا القرش ورميتوا الست اللي ربتكم وعاشت عشانكم أربعين سنة!”
سكت مختار في الفيديو، وأخذ نفساً عميقاً ثم تابع بلهجة قاطعة كحد السيف:
“اسمع يا حسن.. الشركة اللي إنت فرحان بيها دي، مديونة بـ 28 مليون جنيه لبنوك وشركات توريد بسبب صفقاتك الفاشلة اللي كنت بتعملها من ورا ضهري وأنا بدفع تمنها وبسددها.. لو قبلت التركة، هتدخل السجن عشان تسدد الديون دي من لحمك الحي!
وإنت يا محمود.. العمارة والمحلات اللي فاكر نفسك ورثتهم، صدر ضدهم قرار إزالة رسمي وحجز إداري للحي بسبب مخالفات البنا اللي إنت ارتكبتها أيام ما كنت ماسك المقاولات من عشر سنين، وعليك غرامات متلتلة للضرائب هتدفعها إنت وسناء من دم قلبكم!
أما صفية.. رفيقة شقايا وعمري.. فكل قرش صافي، وكل وديعة، وكل دهب، والڤيلا دي، ملك خالص ليها في بنوك مصر وسويسرا، ومتسجل باسمها قانونياً، ومفيش مخلوق يقدر ياخد منها مليم واحد!
أنا حرقت لكم الورق اللي كنتوا بتجروا وراه.. وسيبت لها الأمان اللي تستاهله.. واللي يزرع شوك، ميستناش يحصد غير الخراب!”
