جوزي نسي يجيب بنتنا من الروضه
دي بنتي. روحي شغلك وإنتِ مطمنة.
قفلت معاه، وبصيت لندى.
بابا هو اللي هييجي يا حبيبتي.
وشها نور كأنها أخدت أحلى هدية في الدنيا.
بجد؟ هقوله على المفاجأة اللي عملتهاله!
مفاجأة إيه؟
جريت ناحية شنطتها الصغيرة، وطلعت منها رسمة كانت راسماها بنفسها. ورقة كبيرة فيها تلات أشخاص ماسكين إيد بعض، واحد طويل، وواحدة بشعر طويل، وبنت صغيرة في النص.
فوق الرسمة كتبت بحروف متلخبطة عيلتي.
قالتلي بفخر
دي هديه لبابا. هقوله يحطها في مكتبه عشان لما يشتغل يبقى شايفنا.
حسيت بغصة في حلقي، لكنني ابتسمت.
هيفرح بيها أوي.
قبل ما أخرج، ندى جريت حضنتني.
ماما، ما تنسيش تقولي لبابا ييجي بدري.
حاضر يا روحي.
خرجت وأنا مطمنة، لأن آسر وعدني، ولأنني كنت لسه مصدقة إن الوعود اللي بتتقال لبنت صغيرة لازم تكون أهم من أي حاجة تانية.
في نفس الوقت، كان آسر قاعد في مكتبه في التجمع، قدامه أوراق صفقة جديدة، وعلى مكتبه علبة مخملية صغيرة.
فتح العلبة وبص للخاتم اللي جواها، وبعدها اتصل بواحدة اسمها نورهان.
كل حاجة جاهزة؟
ردت عليه بصوت مليان دلال
تقريبًا، بس أنا لسه مش مصدقة إنك فاكر عيد ميلادي بعد السنين دي كلها.
ابتسم آسر.
في حاجات الواحد عمره ما بينساها.
طب هتكون موجود من بدري؟
أنا اللي هكون مستقبلك بنفسي. ما تقلقيش.
قفل المكالمة، ودخلت عليه أخته مريم.
إنت لسه هنا؟ إحنا اتفقنا نروح نراجع الزينة سوا.
خمس دقايق ونازل.
مريم بصت للعلبة اللي على المكتب.
إيه ده؟
قفلها بسرعة وحطها في درج مكتبه.
هدية.
ابتسمت مريم بمكر.
هدية لمين؟
بصلها بنظرة تحذير.
مريم، بلاش أسئلة كتير.
ضحكت، لكنها قبل ما تخرج قالت
على فكرة، أمل كانت بتكلمني من يومين وبتقول إن ندى نفسها تقضي يوم كامل معاك. خلي بالك من البنت يا آسر، هي كبرت وبقت تفهم.
رد وهو بيرجع يبص في أوراقه
ما تكبريش الموضوع. أمل بتعرف تتصرف.
خرجت مريم، وفضل آسر شوية في مكتبه، قبل ما يفتكر إن عنده حاجة مهمة لازم يعملها بعد الضهر.
لكن الحاجة دي ما كانتش بنته.
كانت حفلة عيد ميلاد نورهان.
المشهد التاني طفلة بتستنى على باب الروضة
الساعة كانت اتنين إلا ربع لما ندى خلصت آخر نشاط ليها في الروضة.
كانت قاعدة جنب الشباك، بتحط رسمة العيلة في شنطتها، وكل شوية تبص للباب.
صاحبتها ليلى قربت منها وسألتها
إنتِ مستنية مامتك؟
ندى هزت راسها بفخر.
لأ، بابا جاي النهارده.
بجد؟
أيوه. هو وعدني.
كانت ندى بتحب كلمة وعد، لأنها كانت فاكرة إن الوعد معناه إن الحاجة هتحصل أكيد.
