روايه انا عاشق لها فارس وريم البارت الاول كامل بقلم الكاتبه نور محمد

"يعني إيه عايشة؟ يعني إيه السنين دي كلها كنت ببكي على قبر فاضي، والنهاردة راجعة تقوليلي إنها لسه على ذمتي وإن ده ابني؟!" فارس الكيلاني كان واقف زي الصنم في نص المكتب، عروق رقبته نافرة وعينيه بتطق شرار وهو بيبص لأمه. الحاجة "توحة" ساندة على عصايتها، وبتبص للباب بخوف وقالت بصوت واطي: "وطي صوتك يا ولدي.. البت نايمة فوق، لو سمعتك هتروح فيها.. انت عارف إن ريم ملهاش ذنب في اللعبة دي." فارس مسح على وشه بعنف وقال بقهرة: "ذنب؟ ريم هي الحاجة الوحيدة النضيفة اللي طلعت بيها من الدنيا.. أنا ما صدقت خفيت من كابوس كاميليا.. تقومي تقوليلي كاميليا عايشة وموجودة في المندرة برة؟ ومعاها حتة عيل بتقول إنه ابني؟" الحاجة توحة بدموع: "يا ولدي أنا اتفاجئت زيي زيك.. دخلت عليا الفجر متلتمة.. وقالتلي إن الحادثة اللي حصلت زمان كانت مدبرة وإنها هربت عشان تحمي ابنك من ولاد عمك.. ودلوقتي رجعت تطالب بحقها وحق ولدك.. ولازم ترجعها الدار وتعلن ده للكل. ده وريث الكيلاني يا فارس." فارس حس إن الدنيا بتضيق بيه. الحاجة توحة كملت بحسم: "أنا كلمت كبارات العيلة.. كاميليا هتبات الليلة في أوضتها القديمة.. ريم مرتك على عيني وراسي، بس أم ولدك ليها حق، ومينفعش نرمي لحمنا." برة المكتب، أنا كنت واقفة متسمرة. الصينية اللي كان عليها كوبايتين القهوة اللي عملتهم عشان نصحى ونشربهم سوا، كانت بتترعش في إيدي. كنت جاية أصحيه وأقوله على السر اللي مخبياه بقالي أسبوع.. كنت جاية أقوله إني أخيرًا حامل. سمعت اسم "كاميليا".. وسمعت كلمة "وريث الكيلاني" و "هتبات في أوضتها". الدنيا اسودت في عيني. امبارح بس كان بيمسح دمعتي وبيقولي "انتي عوضي عن كل وجع شفته". امبارح بس وعدني إن مفيش قوة في الأرض هتاخد مكاني في قلبه. النهاردة؟ مراته الأولانية عايشة؟ وعندها منه ولد؟ وهترجع تشاركني فيه؟ حسيت إن الهوا انسحب من حواليا.. الرؤية زغلت، والصينية وقعت من إيدي بكل اللي عليها. صوت تكسير القزاز كان زي قنبلة انفجرت في سكون البيت. جوه المكتب فارس رفع راسه بسرعة وصرخ: "ايه الصوت ده!" فتح الباب.. لاقاني ساندة على الحيطة وبنزل ببطء للأرض، وشي شاحب زي الموتى وإيدي على بطني. عينه وسعت، ولأول مرة أشوف الخوف بياكل ملامح فارس الكيلاني القوية. "ريــــم!!" نزل على ركبه في ثانية وخدني في حضنه. كنت بقع، بس إيديه القوية لحقتني. صرخ بصوت زلزل جدران القصر: "يا عبده.. اطلبوا الإسعاف فوراً!" شالني وحطني على الكنبة، وفضل يمسح على وشي وإيده بتترعش: "ريم.. يا حبيبتي افتحي عينك.. والله العظيم ما هسيبك، انتي روحي، ردي عليا!" الحاجة توحة طلعت وراه مخضوضة: "يا مراري.. البت سمعتنا يا فارس، واعية لنفسها؟" فارس مردش عليها، بس في اللحظة دي.. باب المندرة اتفتح، وظهرت منه ست ملامحها قاسية وماسكة في إيدها طفل صغير. بصت لفارس وهو حاضنني، وابتسمت ببرود وقالت: "مش هتيجي تسلم على ابنك يا فارس؟ ولا العروسة الجديدة نستك مراتك وأم وريثك؟" فارس بصلها بصدمة وغضب، بس فجأة عينيه نزلت على الأرض.. شاف دم خفيف بيبدأ ينزل مني. صرخ برعب هز المكان: "دكتـــــور.. مراتي وابني بيروحوا مني!" "ابعدي عن وشي الساعادي يا كاميليا! قسماً بعزة جلال الله، لو مراتي أو اللي في بطنها جرالهم حاجة، لادفـ.ـنك مكانك انتي واللي معاكي ومش هيهمني لا كبارات عيلة ولا غيره!" صرخة فارس رجت جدران القصر كله، عينيه كانت حمرا زي الدم وهو بيبص لكاميليا اللي وقفت مكانها مصدومة من رد فعله. متوقعتش أبداً إن دي تكون مقابلتها بعد السنين دي كلها. الحاجة توحة لطمت على صدرها وهي بتشوف الدم: "يا مراري الطافح! دكتور.. اطلبوا دكتور بسرعة يا عبده، البت هتروح مننا!" فارس متلفتش وراه، شالني بين إيديه وكأني روحه اللي بتنسحب منه، طلع بيا السلالم في ثواني وهو بيهمس بصوت مرعوب، صوت عمري ما سمعته من فارس الكيلاني القوي اللي مبيتهزش: "متسيبينيش يا ريم.. وحياتي عندك ما تكسري ضهري.. أنا مصدقت لقيتك، مش هسمحلك تضيعي مني.. ولا انتي ولا حتة مني اللي جواكي." حطني على السرير، وكنت بين الوعي واللاوعي. شايفة طيفه وهو رايح جاي في الأوضة زي الأسد المحبوس، بيمسح على شعره بعنف، وبيضرب كف بكف. الدنيا كانت بتسحبني لتحت.. ظلام بارد بيحاوطني، بس الكلمة الوحيدة اللي كانت بتتردد في وداني زي صدى مميت: "العروسة الجديدة نستك مراتك وأم وريثك؟" بعد دقايق، كانت الدكتورة جوة الأوضة. فارس رفض يخرج، وقف في الزاوية، مربع إيديه، بس صدره طالع نازل بسرعة وكأنه في سباق أنفاس. "طمنيني يا دكتورة.. مراتي مالها؟" قالها بصوت مبحوح. الدكتورة قلعت النضارة وبصتله بجدية: "المدام اتعرضت لصدمة عصبية شديدة، وده أدى لتقلصات قوية في الرحم وبداية نزيف.. الحمل في الشهور الأولى بيبقى حساس جداً." فارس قلبه وقع في رجله: "يعني إيه؟ ابني راح؟" الدكتورة هزت راسها: "الحمد لله قدرنا نلحقه بإبر التثبيت، بس الحالة حرجة جداً. المدام محتاجة راحة تامة، مفيش حركة، ومفيش أي ضغط عصبي أو زعل.. أي انفعال تاني، إحنا مش بس هنخسر الجنين، إحنا ممكن نخسرها هي كمان." الكلمة نزلت على فارس زي رصاصة. قفل عينيه بقوة وخد نفس عميق، وبعدين فتحهم وراح قعد على طرف السرير ومسك إيدي اللي كانت باردة زي التلج. باسها بدموع لأول مرة أشوفها بتلمع في عينه: "أنا آسف.. حقك عليا أنا." فتحت عيني بضعف.. الرؤية كانت مشوشة بس ملامحه كانت واضحة. بصيتله وعيني مليانة عتاب وكسرة، وسحبت إيدي من بين إيديه ببطء. "ريم.." همس بيها بوجع. رديت بصوت متقطع، يادوب طالع من حنجرتي: "روح لمراتك يا فارس.. روح لوريثك." هز راسه بعنف ومسك إيدي تاني بالقوة، كأنه خايف أطير: "انتي مراتي.. مفيش غيرك في قلبي ولا في حياتي. كاميليا دي ماضي، كابوس وانتهى من زمان." نزلت دمعة سخنة على خدي: "بس الكابوس ده رجع.. ومعاه حتة منك. أمك قالت هتبات في أوضتها.. وأنا؟ أنا هبات فين يا فارس؟ على الرف لحد ما تقرروا هتعملوا فيا إيه؟" ملامح فارس اتحولت من الحزن لغضب عاصف، غضب مش مني، غضب من كل اللي بيحصل. قام وقف، وعروق رقبته برزت: "انتي ست الدار دي.. وانتي اللي هتبقي فيها. قسماً بالله يا ريم، ما حد هياخد مكانك ولا حد هيقدر يمس شعرة منك." غطاني كويس، وباس راسي بحنان متناقض تماماً مع العاصفة اللي جواه: "نامي وارتاحي.. واللي في بطنك ده هو وريثي الوحيد اللي مستنيه.. أنا هنزل أنهي المهزلة دي دلوقتي حالا." نزل فارس بخطوات سريعة وتقيلة على السلالم. المندرة كانت هادية، كاميليا قاعدة حاطة رجل على رجل، بتشرب قهوة بكل برود، والولد بيلعب في ركن الأوضة. الحاجة توحة قاعدة ماسكة السبحة وبتبص للولد بلهفة. فارس دخل زي الإعصار، وقفل الباب وراه خبطة زلزلت القصر. "إنتـي إيه اللي رجعك؟" سألها بصوت واطي بس مرعب، صوت يسبق العاصفة. كاميليا ابتسمت ببرود وحطت الفنجان: "تؤ تؤ.. دي طريقة تستقبل بيها مراتك اللي رجعت من الموت؟ وبعدين إيه السؤال ده يا فارس؟ رجعت لبيتي.. ولجوزي.. وعشان ابني يتربى في عز أبوه." فارس ضحك بسخرية قاسية، وقرب منها لحد ما وقف فوق راسها: "بيتك؟ جوزك؟ انتي فاكرة إني عيل صغير هتضحكي عليه بكلمتين الفجرية؟ انتي موتي بالنسبة لي من خمس سنين، الحادثة اللي العربية ولعت بيكي فيها كانت نهاية أسوأ مرحلة في حياتي. فجأة تطلعيلي من تحت الأرض؟" الحاجة توحة اتدخلت: "يا ولدي، البت بتقول هربت من ولاد عمك عشان كانوا طمعانين في الورث وممكن يق/تلوا الولد." بصلها فارس بغضب مكتوم: "وأمي الطيبة صدقت الحكاية الهندي دي؟ ولاد عمي اللي أنا كاسر عينهم وممشيهم على العجين ميلخبطهوش، هيقدروا على مرات فارس الكيلاني؟" رجع بصلها وبص للولد اللي بيلعب: "الولد ده أنا معرفوش.. ولا أعرف هو ابن مين أصلاً." كاميليا وقفت بعصبية لأول مرة بان عليها التوتر: "ولدك يا فارس! نسخة منك وهو صغير.. لحمك ودمك، وهيكبر ويشيل اسمك." فارس ابتسم ابتسامة شيطانية: "حلو أوي.. لو ابني، يبقى مفيش مشكلة من تحليل الـ DNA. بكرة الصبح، دكتور المعمل هيكون هنا.. عينة مني ومنه.. وساعتها بس هنعرف ده ابني ولا ابن مين من اللي كنتي بتعرفيهم من ورايا يا هانم؟!" وش كاميليا بهت، لونها اتخطف لثانية قبل ما تحاول ترسم الثبات: "إنت بتطعن في شرفي يا فارس؟ قدام أمك؟" فارس وطى لمستواها وهمس بصوت فحيح الأفعى: "شرفك ده أنا اللي دفنته بإيدي زمان يوم ما عرفت قذارتك قبل الحادثة.. ولو طلع الولد ده مش ابني.. أنا اللي هقتـ.ـلك المرة دي بجد، ومش هخلي ليكي أثر. سابها مصدومة ومشي ناحية الباب، بس التفت وقال لأمه: "دي ملهاش قعاد هنا.. هتبات في أوضة الخدم تحت المراقبة لحد بكرة الصبح، وممنوع تعتب عتبة باب السلم اللي بيطلع لجناحي أنا ومراتي.. فاهمة يا أمي؟" خرج فارس وراه عاصفة من الغضب، وركب عربيته وطلع بسرعة جنونية عشان يجيب الدكتور بتاع المعمل بنفسه الليلة مش بكرة. فوق في الأوضة، كنت بحاول أغمض عيني، بس الوجع اللي في قلبي أكبر من وجع جسمي. فجأة.. سمعت صوت باب الأوضة بيتفتح ببطء. افتكرته فارس نسي حاجة، فتحت عيني، بس اتجمدت مكاني. كاميليا.. واقفة جوة أوضتي. قفلت الباب وراها بالمفتاح، وقربت من السرير بخطوات بطيئة، وابتسامة خبيثة على وشها. حاولت أقوم، بس صرخت من الوجع اللي ضرب أسفل بطني. "مكانك يا حلوة.. متتعبيش نفسك." قالتها وهي بتقعد على الكرسي اللي جنب السرير بكل هدوء. بصيتلها برعب: "إنتي إيه اللي جابك هنا؟ فارس لو شافك هيـ..." قاطعتني بضحكة مستفزة: "فارس مش هنا.. فارس طار بعربيته عشان يثبت إني كدابة والولد مش ابنه.. بس هو ميعرفش إنه بيجري ورا سراب." قربت وشها مني لحد ما حسيت بأنفاسها، وهمست بصوت مليان شر: "انتي فاكرة فارس بيحبك؟ فاكرة إن الحمل ده هيخليه يفضل متمسك بيكي؟ إنتي غلبانة أوي يا ريم.. فارس متجوزك لسبب واحد بس.. ولما تعرفيه، إنتي بنفسك اللي هتموتي الجنين ده وتجري من القصر ده حافية." قلبي كان بيدق بسرعة لدرجة حسيت إنه هيقف: "إنتي كدابة.. فارس بيحبني." طلعت من جيبها صورة قديمة، ورمتها على المخدة جنبي. "بصي في الصورة دي كويس.. بصي وشوفي فارس كان بيعشق مين.. وشوفي إنتي هنا بتدفعي تمن شبهك بمين!" نزلت عيني للصورة.. وشوفت حاجة خلت الدم يهرب من عروقي، وعيني توسع بصدمة شلت لساني... "إنتي مستحيل تكوني بني آدمة.. إنتي شيطان!" صرخت بيها وأنا حاسة إن الدنيا بتسود تاني. ابتسمت كاميليا وقربت إيدها من بطني وقالت: "...................." يتبع.. في البارت الثاني جديد وحصري بقلم #الكاتبه_نور_محمد .... اثبـت وجـودك معانـا ب لايـك وتعليـق على الصـفـحة♥️ وتـابـع الحـلقـات كـامـلة مـن هنـا🎁👇 "إيدك لو لمست بطني هقطعها لك يا كاميليا! فكرة إني ضعيفة ونايمة على السرير دي طلعيها من دماغك، أنا ممكن أموتك وأموت نفسي ولا إنك تقربي من ابني!" صرخت بيها بكل عزم عندي وأنا بضرب إيدها بكل قوتي، رغم الوجع اللي كان بيمزق أسفل بطني. كنت بتنفس بسرعة، عيني مفتوحة على آخرها بحمي حتة الروح اللي جوايا بشراسة أم حسّت بالخطر. ضحكت كاميليا بصوت مكتوم، ضحكة خبيثة مسمومة، ورجعت خطوة لورا وهي بتبصلي باستهزاء: "ياااه.. شرسة أوي العروسة الجديدة! بس متخافيش يا غلبانة، أنا مش هوسخ إيدي بيكي.. الجنين ده أصلاً مش هيعيش، فارس مبيخلفش غير من كاميليا، وده وعد هو وعدهولي زمان.. بصي للصورة كويس واعرفي حجمك الحقيقي في الدار دي." مديت إيدي المرتعشة وسحبت الصورة من على المخدة. عيني نزلت عليها، وفي ثانية واحدة حست إن قلبي اتعصر بين كفين من نار. الصورة كانت لفارس، أصغر شوية في السن، بيضحك من قلبه ضحكة عمري ما شفتها منه، وحاضن بنت.. البنت دي كانت نسخة مني! نفس العيون الواسعة، نفس رسمة الوش، نفس الشعر الأسود الطويل.. بس اللبس كان قديم شوية. "مين دي؟" سألتها وصوتي بيترعش، حنجرتي كانت مقفولة كأن فيها شوك. قربت كاميليا ووشها بيشع شماتة وهمست: "دي 'ليلى'.. بنت عمه وعشقه الأول والأخير.. اللي ماتت مقتولة بسببه وبسبب عندُه.. وانتي؟ انتي مجرد صورة متحركة ليها.. جابك من الشارع عشان يسكت بيه ضميره اللي بياكله، وعشان يملى الفراغ ويحس إنها لسه عايشة.. انتي ولا حاجة يا ريم، انتي مجرد استنساخ لعروسة ميتة، مجرد دواء مسكن لوجع فارس الكيلاني!" الدنيا لفت بيا.. معقولة؟ معقولة حنيته، خوفه عليا، لمعة عينه وهو بيقولي بحبك، كل ده مكنش ليا؟ كان لـ ليلى؟ أنا مجرد بديل؟ خيال مآتة متلبس بملامح واحدة تانية؟ الوجع اللي ضرب قلبي في اللحظة دي كان أقوى ألف مرة من وجع النزيف. وقبل ما أرد أو حتى أستوعب الضربة اللي قطمت وسطي، حسيت بزلزال بيضرب الأوضة! الباب اتخبط برجلة عنيفة هزت الحيطان، وانفتح على مصراعيه، وظهر فارس! مكنش مشي.. قلبه مطاوعهوش يسيبني ويمشي، رجع عشان يطمن عليا قبل ما يروح يجيب دكتور المعمل. عينه جت عليا وأنا منهارة وببكي وماسكة الصورة، وبعدين جت على كاميليا اللي واقفة قصادي. في كسر من الثانية، عروق وشه برزت، وعينيه اتحولت لكتلة من الجحيم. ملامحه بقت مرعبة لدرجة إن كاميليا شهقت برعب ورجعت لورا خطوتين وهي بتترعش: "فـ.. فارس.. أنا كنت بس بطمن عليها.." "انتي بتعملي إيه هنا يا فاجـ.ـرة؟!" زأر بيها بصوت خلى القصر كله يترج، وهجم عليها زي الأسد الهايج. مسكها من شعرها بعنف لدرجة إني سمعت صوت خبطتها في الدولاب. صرخت كاميليا بأعلى صوتها: "آآآه.. سيبني يا فارس! سيبني!" مردش عليها، سحبها وراه من شعرها زي الدبيحة على الأرض، وخرج بيها من الأوضة وهو بيجرجرها على السلالم من غير ذرة رحمة. حاولت أقوم أقف على رجلي عشان أشوف بيحصل إيه، سحبت نفسي بالعافية لحد باب الأوضة، ووقفت أراقب اللي بيحصل تحت وأنا ساندة على الحيطة وبنهج. في المندرة تحت، الحاجة توحة طلعت تجري على صوت الصريخ، ولطمت على وشها لما شافت فارس رامي كاميليا تحت رجليه وبيشاورلها بصباعه اللي بيترعش من الغضب: "أنا قولتلك رجلك متخطيش عتبة السلم ده! قولتلك غوري في داهية تحت لحد ما أشوفلك صرفة! بس وحياة أغلى حاجة عندي، اللي هي مراتي وابني اللي فوق دول، لو فكرتي مجرد تفكير تقربي منهم تاني، لأكون دافنك في مكانك، وهقدم فيكي بلاغ تزوير ونصب يرميكي في السجن تخيسي فيه بقية عمرك!" كاميليا كانت بتعيط بتمثيل وبتبص للحاجة توحة: "يرضيكي كده يا حاجة؟ يضرب أم حفيده عشان خاطر حتة عيلة ميسواش تلاتة تعريفة؟" الحاجة توحة حاولت تهدي الموقف: "يا ولدي استهدى بالله، الولد واقف بيتفرج وبيترعش، متكسرش بخاطر لحمك!" فارس بصلها وبص للولد اللي كان متكوم في ركن الأوضة بيعيط. أخد نفس عميق بيحاول يهدي العاصفة اللي جواه، وقرب من الولد ببطء. نزل على ركبته عشان يبقى في مستواه، ملامحه لانت شوية، وقال بصوت هادي: "متخافش يا حبيبي.. أنا مش هأذيك، تعالى هنا." الولد رجع لورا بخوف أكتر، ومسك في ستارة الشباك وهو بيعيط بهيستريا وصرخ بكلمات نزلت زي الصاعقة على كل اللي واقفين: "لا.. ابعد عني.. أنا عايز أروح لبابا.. بابا طارق قالي إنك وحش ومفتري وهتضربنا وتاخد فلوسنا.. أنا مش عايز أبقى ابنك، أنا عايز بابا طارق!" الصمت اللي نزل على القصر في اللحظة دي كان أصعب من صوت الرصاص. طارق؟ طارق الكيلاني؟ ابن عم فارس وعدوه اللدود اللي بيحاربه في الورث وفي السوق بقاله سنين؟ كاميليا وشها جاب ألوان، شفايفها بقت بيضا زي الأموات، وحاولت تجري على الولد تسكته: "اخرس يا غبي، إنت بتقول إيه؟!" فارس قام وقف ببطء شديد.. الهدوء اللي ظهر عليه فجأة كان مرعب أكتر من غضبه.. عينيه اتحولت لسواد قاتم، وابتسم ابتسامة خلت الدم يهرب من عروق كاميليا. "طارق؟" همس بيها فارس وهو بيهز راسه ببطء.. "كده اللعبة وضحت.. وكده نهايتك اتكتبت يا كاميليا.. انتي وطارق." في اللحظة دي، وقبل ما فارس ياخد خطوة واحدة ناحيتها، تليفونه رن بصوت عالي قطع الصمت المميت ده. فارس طلع التليفون من جيبه من غير ما ينزل عينه من على كاميليا، ورد بجمود: "أيوة." صوت الدكتورة اللي كشفت عليا من شوية كان جاي من السماعة، عالي ومتردد لدرجة إني سمعته من مكاني فوق: "فارس بيه.. أنا آسفة إني بتصل في وقت زي ده.. بس تحاليل الدم بتاعة المدام ريم اللي سحبناها من شوية ظهرت نتيجتها.. ولازم أبلغك فوراً." فارس كشر وقال بحدة: "في إيه؟ مراتي مالها؟" الدكتورة سكتت ثانية، وبعدين قالت جملة زلزلت كياني وخلت فارس يتسمر مكانه: "المدام ريم مكنتش بتسقط بسبب صدمة عصبية يا فارس بيه.. تحاليل الدم أثبتت إن المدام بتاخد جرعات منتظمة من سـ.ـم بطيء بيسبب الإجهاض وتدمير الرحم.. السم ده بيتحطلها في أكلها بقاله أكتر من أسبوعين من جوة القصر عندكم!" فارس نزل التليفون من على ودنه ببطء، ورفع عينه بصلي فوق، وبعدين نزل عينه على أمه، وعلى كاميليا، وعلى الشغالة اللي كانت واقفة بعيد بتترعش... "سم في أكل مراتي؟ بقاله أسبوعين بيتدس في دار الكيلاني؟ في بيتي اللي مفيش دبانة بتدخله من غير إذني؟!" الصوت طلع من أعماق فارس زي زئير وحش جريح، التليفون وقع من إيده على الأرض اتدش دش حتت، وعينيه اتحولت لكتلة من النار بتحرق كل اللي بتبصلهم. قفل باب المندرة الرئيسي بالمفتاح وشده بعنف، وصرخ بأعلى صوته لحراسة القصر برة: "مفيش مخلوق يعتب برة الباب ده! اللي هيحاول يخرج، اضربوه بالنار على مسؤوليتي!" لف وشه وبص للي واقفين في المندرة.. الحاجة توحة اللي وشها جاب ألوان وسندت على الحيطة من الصدمة، كاميليا اللي رجليها مبقتش شايلاها والولد ماسك فيها بيترعش، و"سعاد" الشغالة اللي كانت واقفة في الركن بتترعش زي الورقة في مهب الريح. فارس مشي بخطوات بطيئة، مميتة، وكل خطوة كانت بترن في سكون القصر زي دقات ساعة الإعدام. وقف قدام كاميليا اللي كانت بتحاول تداري رعبها، وميل عليها وهو بيجز على أسنانه: "أسبوعين.. يعني السم بيدخل لمراتي من قبل ما جنابك تشرفي من الموت المزعوم بتاعك.. بس ده ميمعنش إنك بريئة. إنتي وطارق الكلب متفقين على اللعبة دي.. طارق كان عارف إن ريم حامل، وعارف إن الجنين ده هو اللي هيقفل عليه باب الورث للأبد.. فقرر يخلص منه." كاميليا بلعت ريقها بصعوبة وقالت بصوت متقطع: "أنا.. أنا ماليش دعوة.. أنا لسه واصلة النهاردة، معرفش حاجة عن سم ولا غيره!" فارس ضحك ضحكة قصيرة مرعبة: "هنعرف.. كل حاجة هتبان. بس مبدئياً كده، حسابك معايا مبقاش بس على كدبتك وعيلك اللي جايباه تتبلي بيه عليا.. حسابك معايا بقى قضايا نصب، وتزوير، وتشهير.. ده غير إني هلبسك إنتي وطارق ق/ضية شروع في قت/ل تقضوا فيها بقية عمركم في السجن.. أنا هخليكم تتمنوا الموت وماتطولوهوش!" سابها وهي منهارة تماماً، ولف وشه للشغالة "سعاد". عينيه نزلت عليها زي الصقر اللي لقى فريسته. قرب منها وفجأة مسكها من ياقة هدومها ورفعها عن الأرض.. الشغالة صرخت برعب: "يا بيه أبوس إيدك ارحمني.. ماليش ذنب.. ماليش ذنب!" "مين اللي اداكي السم يا سعاد؟" سألها فارس بصوت واطي بس كان أخطر من الصريخ. "انطقي بدل ما أدفنك حية في مكانك.. مين اللي كان بياخد منك فلوس عشان يحط الموت في أكل مراتي؟!" سعاد انهارت في البكا، ووقعت على ركبها قدامه وهي بتبوس في جزمته: "هقول.. هقول والله يا بيه! الست كاميليا هي اللي كلمتني في التليفون من أسبوعين.. وقالتلي إنها عايشة، وبعتتلي ظرف فيه فلوس كتير مع البوسطجي.. ومعاه إزازة دوا صغيرة.. وقالتلي أحط نقطتين كل يوم في عصير الست ريم عشان متخلفش.. حلفتلي إنه دوا منع حمل مش سم.. والله يا بيه قالتلي منع حمل مكنتش أعرف إنه بيموت الجنين!" كاميليا صرخت بهيستريا: "كدابة! يمين بالله كدابة.. دي بتتبلى عليا عشان تنقذ نفسها!" فارس مغمض عينيه للحظة بيحاول يستوعب حجم الخيانة والقذارة اللي محاوطاه، وقبل ما يرفع إيده عشان ينهي حياة كاميليا في اللحظة دي.. سمع صوت من وراه خلاه يتجمد مكانه. "سيبهم يا فارس." الصوت كان ضعيف، مكسور، بس كان فيه قوة غريبة خلت الكل يرفع راسه ويبص على السلم. كنت واقفة هناك. ساندة على درابزين السلم بالعافية، وشي شاحب زي الموتى، وعيني دبلانة بس بتلمع بنار العتاب والكسرة. كنت لابسة الروب بتاعي، وماسكة في إيدي اليمين الصورة القديمة. "ريم!" فارس صرخ بلهفة ورعب، وساب الشغالة وطلع السلالم جري، "إنتي إيه اللي نزلك؟ الدكتورة قالت متتحركيش من سريرك.. انتي بتنزفي يا مجنونة!" حاول يمد إيده عشان يشيلني، بس أنا رفعت إيدي التانية ووقفته. رجعت خطوة لورا، وبصيتله بنظرة خليته ينزل إيده ببطء وكأن فيها شلل. "متلمسنيش." قولتله بصوت مهزوز بس حاسم. "ريم.. حبيبتي اسمعيني، أنا عرفت كل حاجة.. الحيوانة دي هي اللي حطتلك السم، وأنا هدفنها حية هي واللي معاها، بس ارتاحي انتي الأول عشانا وعشان ابننا." ابتسمت بسخرية موجعة، ودموعي نزلت على خدي تحرقني: "ابننا؟ هو لسه فينا إحنا يا فارس؟ أنا مش نازلة عشان السم.. السم اللي في بطني كان أرحم من السم اللي سقيتهولي من يوم ما دخلت الدار دي." فارس كشر بعدم فهم، وملامحه اتملت قلق: "إنتي بتقولي إيه؟ سم إيه اللي سقيتهولك؟ أنا كلي ليكي!" رفعت إيدي اللي بتترعش، ووجهت الصورة في وشه. "كلك ليا؟ ولا كلك لـ 'ليلى'؟" الاسم نزل عليه زي الصاعقة. لونه اتخطف، وعينيه وسعت برعب حقيقي، رعب مشفوتوش فيه لما عرف إن ابنه بيموت.. رعب واحد السر اللي عاش يداريه طول عمره اتكشف في أسوأ لحظة ممكنة. "الصورة دي كانت معاها." شاورت على كاميليا اللي كانت بتبصلنا بشماتة رغم المصيبة اللي هي فيها. كملت وأنا حاسة إن روحي بتطلع: "جاوبني يا فارس الكيلاني.. أنا مين؟ أنا ريم اللي حبيتها؟ ولا أنا مجرد عروسة حلاوة، استنساخ لليلى اللي ماتت بسببك؟ جيبتني من الشارع عشان تلبسني وشها، وتعيش معايا كذبة إنها لسه عايشة؟" فارس كان بيتنفس بصعوبة، حاول يتكلم بس صوته خانه: "ريم.. أنا.. ليلى دي ماضي.. أنا بحبك إنتي.." "كداب!" صرخت فيها بكل قوتي لحد ما حسيت بوجع شق بطني نصين. "لو بتحبني مكنتش خبيت عليا.. مكنتش خليتني أعيش مخدوعة في كل لمسة، وكل كلمة حب كنت بتقولها وأنت شايف فيها واحدة تانية! أنا بكرهك يا فارس.. بكرهك!" وفجأة.. الوجع تضاعف، مقدرتش أصلب طولي أكتر من كده. حسيت بسخونة رهيبة بتنزل مني، والدنيا بدأت تدور بيا بسرعة مرعبة. وقعت على ركبي على السلم، وفارس صرخ ورمى نفسه على الأرض عشان يلحقني. شالني بين إيديه وهو بيبكي لأول مرة زي الطفل: "لا يا ريم.. لا والنبي.. متموتيش.. متسيبينيش زيها.. أنا بحبك إنتي والله العظيم بحبك إنتي!" بس في وسط المشهد المأساوي ده.. وفي عز انهيار فارس وضعفي، حصلت حاجة قلبت الموازين كلها. صوت فرامل عربيات كتير زمرت برة القصر، وراها صوت ضرب نار في الهوا كسر سكون الليل، وباب القصر الخارجي اتكسر بعنف ودخلت منه قوة مسلحة، وفي وسطهم راجل لابس بدلة سودا، ملامحه قاسية ونظراته كلها شر. طارق الكيلاني دخل المندرة بخطوات واثقة، ووراه قوة من الشرطة. بص لكاميليا اللي جريت عليه تستخبى وراه، وبعدين رفع عينه لفارس اللي كان قاعد على السلم وحاضنني غرقان في دمي ودموعه. ابتسم طارق ببرود شيطاني وقال بصوت عالي: "تؤ تؤ.. مشهد يقطع القلب يا ابن عمي.. بس أنا مش جاي أعزي.. أنا جاي أستلم مراتي وابني من القصر بتاعك.. وجايب البوليس معايا عشان أقبض عليك بتهمة خطفهم.. واحتجازهم بالقوة!" فارس رفع راسه، وعينيه اللي كانت مليانة دموع من ثانية، اتحولت لكتلة سواد مرعبة، وحطني على السلم براحة، وقام وقف وهو بيمسح الدم من على إيده.. الصدام الكبير بدأ.. يا ترى فارس هيعمل إيه مع طارق؟ وريم والجنين مصيرهم إيه بعد كشف سر ليلى؟ .... اثبـت وجـودك معانـا ب لايـك وتعليـق على الصـفـحة♥️ وتـابـع الحـلقـات كـامـلة مـن هنـا🎁👇 "مراتك؟ وابنك؟" الكلمتين طلعوا من بين شفايف فارس وهو بيمسح الدم اللي على إيده في بنطلونه ببطء شديد، الهدوء اللي نزل عليه فجأة كان مرعب، هدوء ما قبل الإعصار. وقف بكامل طوله، وعينيه اللي كانت بتلمع بالدموع من ثانية واحدة، اتحولت لكتلة من الجليد الأسود. بص للظابط اللي داخل مع طارق، وبعدين نقل نظره لطارق اللي كان واقف بابتسامة نصر مزيفة متخيل إنه أخيرًا كسر غريمه. فارس ضحك ضحكة قصيرة، ضحكة كلها سخرية وسواد، وقال بصوت جهوري هز جدران المندرة: "يا باشا، الراجل اللي واقف جنبك ده بيعترف قدامكم بج/ريمة نصب وتزوير وتشهير كاملة الأركان!" الظابط كشر وبص لطارق اللي ابتسامته اختفت، وبعدين بص لفارس وقال باحترام متوجس: "فارس بيه، إحنا جالنا بلاغ رسمي باحتجازك لست وطفل بالقوة هنا في القصر، والأستاذ طارق قدم قسيمة جواز رسمية بتثبت إنها مراته." فارس قرب من الظابط بخطوات واثقة، وعينه مفارقتش طارق اللي بدأ يعرق، وقال بنبرة حادة زي السيف: "قسيمة جواز؟ من مين؟ من كاميليا هانم اللي متسجلة في الدفاتر الرسمية وشهادات الوفاة إنها ميتة من خمس سنين في حادثة عربية؟ واللي الأهم من ده كله، إنها كانت على ذمتي أنا يوم ما ماتت؟" صوت فارس علي أكتر وهو بيشاور على كاميليا اللي بتترعش ورا طارق: "يعني لو هو متجوزها من سنين ومخلف منها، يبقى دي ج/ريمة تزوير في أوراق رسمية، ونصب على القانون، وتشهير بيا وبعيلتي! ده غير المصيبة الأكبر.. الست اللي هو جايبكم عشان تنقذوها دي، لسه متورطة في محاولة قت/ل.. حطت سم لمراتي اللي بتنزف على السلم ورايا دي!" الظابط اتصدم، وطارق وشه جاب ألوان وحاول يدافع عن نفسه بعصبية: "إنت بتخرف بتقول إيه يا فارس! سم إيه ومحاولة ق/تل إيه؟ إنت بتألف حوارات عشان تهرب من المصيبة اللي إنت فيها!" فارس متلفتش لطارق، فضل باصص للظابط وقال بثبات: "الدكتورة بتاعت مراتي على التليفون، وتحاليل الدم في المعمل بتثبت وجود سم في دمها بقاله أسبوعين بيتدس في الأكل، والشغالة اللي خادت الفلوس من كاميليا عشان تحط السم مرمية تحت رجليكم بتعترف بكل حاجة. أنا بطالب بالقبض على طارق الكيلاني وكاميليا فوراً بتهمة الشروع في الق/تل، والنصب، والتزوير!" الظابط أدى إشارة للعساكر اللي اتحركوا فوراً وحاوطوا طارق وكاميليا. طارق بدأ يزعق ويفرفر: "إنتوا بتعملوا إيه! إنتوا مصدقين المجنون ده؟ دي مؤامرة!" وكاميليا صرخت وهي بتمسك في الولد اللي بيعيط بهيستريا. فارس سابهم يواجهوا مصيرهم، ولف وشه بسرعة البرق ورجعلي على السلم. شالني بين إيديه وكأني روحه اللي بتنسحب منه. عروق رقبته كانت نافرة وهو بيجري بيا على برة، بيصرخ في السواق وحراسه: "العربية بسرعة! اقلبوا الدنيا.. لو مراتي حصلها حاجة هحرق البلد باللي فيها!" طول الطريق للمستشفى، أنا كنت في عالم تاني. الوجع اللي في بطني كان بيمزقني، بس مكنش ييجي حاجة جنب الوجع اللي في قلبي. كنت باصة للسقف، شايفة ملامح "ليلى" بتترسم قدامي. صورتها وهي بتضحك في حضنه مش مفارقة خيالي. فارس كان حاضنني في الكرسي اللي ورا، دافن وشه في رقبتي ودموعه السخنة بتنزل على جلدي، بيهمس بكلام كتير مش قادرة أجمعه: "سامحيني.. حقك عليا.. متسبينيش يا ريم.. أنا ماليش غيرك.. والله العظيم ما حبيت غيرك." كلامه كان عامل زي الملح على الجرح. كل كلمة حب بيقولها، كنت بحس إنها بتتقالها هي مش ليا. أنا مجرد ظل، مجرد وعاء بيفرغ فيه شوقه لليلى. وصلنا المستشفى، والدنيا اتقلبت. طوارئ ودكاترة بيجروا، سرير متحرك بياخدني من بين إيديه، وهو ماسك إيدي مكلبش فيها لحد ما باب العمليات قفل بيني وبينه. مرت ساعات حسيتها سنين. في أوضة الإفاقة، فتحت عيني بتقل. الرؤية كانت مشوشة، ريحة المعقمات ملت صدري. أول حاجة حسيت بيها هي إيد دافية وماسكة إيدي بقوة. لفيت وشي بضعف، لقيته قاعد جنبي. عينيه حمرا زي الدم، شعره منكوش، وهدومه لسه عليها بقع من دمي. أول ما شافني فتحت عيني، قام بسرعة وباس راسي وإيدي بلهفة: "ريم.. حبيبتي.. روحي رجعتلي تاني.. حمد لله على سلامتك يا نور عيني." سحبت إيدي من بين إيديه ببطء شديد، حركة خليت قلبه يقع. بصتله بنظرة خالية من أي مشاعر، نظرة باردة موتت كل الفرحة اللي في عينه. "ابني.. ابني عايش؟" سألته بصوت مبحوح ويادوب طالع. فارس بلع ريقه بصعوبة، وهز راسه بسرعة بابتسامة مهزوزة: "عايش.. عايش يا ريم. الدكاترة لحقوه بمعجزة.. السم مكنش لسه دمر الرحم بالكامل، عملوا عملية تنضيف سريعة وادولك أدوية تثبيت.. هو بخير وانتي بخير، وده الأهم." أخدت نفس طويل، وغمضت عيني ثانية، وبعدين فتحتها وبصتله مباشرة في عينه. "كويس إنه عايش." قولت ببرود، "عشان مش هينفع يتربى في بيت مبني على كدبة." فارس ملامحه اتشنجت، وقرب مني بخوف: "ريم.. أرجوكي.. اديني فرصة أفهمك. الصورة اللي شوفتيها دي.." "متجيبش سيرتها!" قاطعته بحسم مكنتش أعرف إني أملكه في عز ضعفي. "مش عايزة أسمع مبررات.. مش عايزة أسمع قصة حبك الأسطورية لليلى وموتها المأساوي وإزاي أنا شبهها فقررت تشتريني.. انت خدعتني، كسرتني، واستغليتني أسوأ استغلال ممكن راجل يعمله في ست." "لا يا ريم والله العظيم لا!" فارس صرخ بوجع ودموعه نزلت، مسك إيدي تاني غصب عني، "أنا أول ما شوفتك اتصدمت بالشبه.. أيوه في الأول كنت مذهول.. بس بعدين.. أنا حبيتك إنتي! عشقت تفاصيلك إنتي، روحك، طيبتك.. إنتي غيرها خالص يا ريم.. ليلى ماضي اندفن، إنتي الحاضر والمستقبل!" ضحكت بوجع ودموعي نزلت: "لو ماضي اندفن.. كنت خبيت الصورة ليه؟ لو ماضي اندفن.. مكنتش خفت تقولي الحقيقة ليه؟ فارس.. أنا مش هكمل معاك.. أنا عايزة أطلق." الكلمة نزلت عليه زي رصاصة الرحمة. وقف مكانه متسمر، مش قادر يتنفس، وكأن حد سحب الأكسجين من الأوضة. "تطلقي؟" همس بيها بضياع. "انتي بتقولي إيه؟ ده مستحيل يحصل.. على ج/ثتي يا ريم تخرجي من ذمتي!" وقبل ما أرد عليه ونكمل خناق، باب الأوضة خبط وانفتح بسرعة. دخلت الممرضة وشها مخطوف، وبتبص لفارس برعب: "فارس بيه.. في مصيبة برة!" فارس لف وشه بعصبية: "في إيه زفت تاني؟" الممرضة بلعت ريقها وقالت بصوت بيترعش: "الظابط اللي كان عندكم في القصر وصل المستشفى دلوقتي.. ومعاه أمر ضبط وإحضار للمدام ريم!" أنا شهقت، وفارس برق عينه بصدمة وصرخ: "نعم يا روح أمك؟ أمر ضبط وإحضار لمراتي؟ بتهمة إيه؟" الممرضة رجعت لورا بخوف وقالت جملة خلت المستشفى تلف بيا أنا وفارس: "طارق بيه قدم بلاغ رسمي، ومعاه ورق بيثبت إن المدام ريم اللي نايمة قدامك دي... تبقى أخت ليلى التوأم اللي اتخطفت من وهي طفلة، ومطلوبة في قضية تزوير هوية!" أنا أخت ليلى؟ توأمها؟ بصيت لفارس اللي كان وشه عبارة عن لوحة من الرعب والصدمة اللي شلت تفكيره.. "أخت توأم إيه وتزوير هوية إيه؟! انتوا اتجننتوا ولا طارق الكلب لحس عقولكم؟ قسماً بعظمة الله اللي هيفكر يقرب من باب الأوضة دي هطربق المستشفى دي على دماغه ودماغ اللي باعتينه!" صرخة فارس رجت طرقة المستشفى كلها، صوته كان عامل زي الرعد اللي بيسبق عاصفة مدمرة. وقف قدام باب أوضتي زي الأسد المجروح اللي بيدافع عن عرينه، صدره طالع نازل بسرعة، وعروق إيديه نافرة وكأنها هتنفجر. الظابط اللي كان واقف برة، ومعاه قوة من العساكر، حاول يحافظ على هدوئه رغم الرعب اللي كان باين في عينين كل اللي في الطرقة. اتكلم بصوت واطي بس حازم: "يا فارس بيه، اهدى أرجوك.. إنت راجل قانون وعارف إننا بننفذ أوامر النيابة. طارق بيه قدم بلاغ رسمي مدعوم بمستندات، وشهادات ميلاد، وتحليل DNA كمان، بيثبت إن المدام اللي جوة دي مش 'ريم الشناوي' زي ما بطاقتها بتقول.. دي 'ليال الكيلاني'، الأخت التوأم لـ 'ليلى الكيلاني' اللي اتسجلت ميتة من وهي طفلة رضيعة. دي جناية تزوير وانتحال صفة، والنيابة أمرت بالتحفظ عليها فوراً." فارس ضحك ضحكة مجنونة، ضحكة خلت قلبي يرتجف وأنا نايمة على السرير جوة، سامعة كل كلمة بتتقال برة كأنها سكاكين بتتقطع في لحمي. "تحليل DNA؟" زأر فارس بسخرية موجعة، "طارق الكلب لحق يعمل تحليل DNA إمتى؟ وهو خد عينة من مراتي إزاي؟ إنتوا مش شايفين إن دي لعبة مكشوفة عشان يكسرني بيها؟" الظابط طلع ملف من جيبه ورفعه قدام فارس: "طارق بيه قال في التحقيقات إنه كان شاكك من يوم ما إنت اتجوزتها بسبب الشبه المستحيل بينها وبين المرحومة بنت عمك.. ولما جاب ناس تدور وراها في الملجأ اللي اتربت فيه، اكتشف إن مفيش بنت دخلت الملجأ بالاسم ده في السنة دي.. وإن مديرة الملجأ استلمتها من واحدة مجهولة. طارق بيه جاب العينة من فرشاة شعرها من قصرك بطريقته.. والتحليل اتطابق مع عينة قديمة للمرحومة ليلى." جوة الأوضة، أنا كنت حاسة إن روحي بتنسحب مني. الدموع جفت في عيني من كتر الصدمة. أنا؟ أخت ليلى؟ توأمها؟ شريط حياتي كله مر قدام عيني في ثانية. طفولتي في الملجأ، الوحدة، الجوع للحنان، نظرات الناس ليا كأني مقطوعة من شجرة. عشت عمري كله فاكرة إني "ريم الشناوي"، بنت ملهاش أصل ولا فصل، أبوها وأمها ماتوا في حادثة قطر وسابوها لحم أحمر. يوم ما فارس الكيلاني ظهر في حياتي، افتكرته العوض.. بس طلع هو كمان فخ. ودلوقتي، بكتشف إن ليا عيلة؟ إن ليا أخت توأم.. والأخت دي هي نفسها شبحي اللي بيدمر حياتي؟ هي اللي جوزي كان بيعشقها؟ "أنا.. أنا ليال؟" همست بيها لنفسي، وصوتي كان بيترعش زي ورقة شجر في خريف قاسي. برة، فارس مقدرش يمسك نفسه أكتر من كده. هجم على الظابط ومسكه من ياقة بدلته الميري بعنف خلى العساكر ترفع سل/احها. "نزلوا سل/احكم يا شوية أغبية!" صرخ فارس في العساكر، وبعدين بص للظابط وعينيه بتطق شرار: "مراتي بين الحياة والموت! لسه طالعة من عمليات، وكانت بتسقط، وبتنزف! قسماً بالله لو حد دخلها دلوقتي، لا هعملكم كلكم جنايات، وهلبس فيها إعدام وأنا مرتاح. أنا هكلم المحامي بتاعي وهكلم مدير الأمن شخصياً، بس مراتي مش هتتحرك من سريرها خطوة واحدة!" في اللحظة دي، باب الأوضة اتفتح، وخرجت الدكتورة بتاعتي ووشها مخطوف. "في إيه يا جماعة؟! إنتوا في مستشفى مش في ساحة حرب!" زاعقت الدكتورة، وبصت للظابط بتحدي: "المريضة اللي جوة دي حالتها حرجة جداً. نقلها من السرير أو حتى تعريضها لأي ضغط نفسي دلوقتي معناه انفجار في الرحم ونزيف حاد هيقضي عليها وعلى الجنين. أنا كطبيبة مسئولة عن حالتها، برفض تماماً أي إجراء أمني يتم معاها لمدة 48 ساعة على الأقل، وده تقرير طبي رسمي هكتبهولك دلوقتي." الظابط بلع ريقه، وبص لفارس اللي كان واقف زي الجبل مبيتهزش، وبعدين اتنهد وقال: "تمام يا دكتورة. أنا هسيب حراسة مشددة على باب الأوضة وعلى باب المستشفى. بس فارس بيه.. طارق بيه مش هيسكت، والنيابة هتطلب لجنة طبية تتأكد من كلامك." الظابط انسحب، والعساكر وقفوا انتباه على الباب. فارس دخل الأوضة، وقفل الباب وراه بالراحة. سند ضهره على الباب وغمض عينيه ثواني، كان بياخد نفسه بصعوبة، كأن جبل اترفع من على صدره مؤقتاً. فتح عينيه وبصلي. عينه كانت مليانة وجع، وحيرة، وخوف. قرب من السرير بخطوات تقيلة، وسحب كرسي وقعد جنبي. بصلي كتير، كأنه بيدور في ملامحي على الحقيقة. كأنه بيشوف ليلى وبيشوفني في نفس اللحظة. "إنت كنت تعرف؟" سألته بصوت ضعيف، مخنوق بالدموع اللي بدأت تنزل تاني. "كنت تعرف إني أختها؟ رديت عليا بصراحة يا فارس.. كفاية كدب لحد كده." فارس مسك إيدي بسرعة، وكأنها طوق النجاة بتاعه، وباسها بدموع: "ورحمة أبويا ما كنت أعرف يا ريم.. اقسم بالله العظيم ما كنت أعرف إن ليلى ليها توأم أصلاً! عمي خباكي زمان عشان كان خايف عليكم من الصراعات والدم اللي في عيلتنا.. طارق وأبوه كانوا طمعانين في الورث وكانوا ممكن يق/تلوكم. أنا يوم ما شوفتك في الشارع، قلبي وقف من الشبه، كنت فاكرك معجزة من ربنا عشان يعوضني.. بس عمري ما تخيلت إنك لحمها ودمها." سحبت إيدي بضعف ولفيت وشي الناحية التانية: "يعني إنت حبيتني عشان أنا شبهها.. ودلوقتي طلعت أختها. اللعبة باظت يا فارس. أنا بقيت مجرمة في نظر القانون، وهخش السجن، وابني هيتولد ورا القضبان بسبب عيلتكم القذرة دي." "مفيش سجن هتدخليه طول ما أنا بتنفس!" فارس قالها بحسم، وقام وقف، عينيه رجعت تلمع بالغضب الأسود. "أنا هقلب الدنيا على دماغ طارق. هو فاكر إنه كسب الجولة؟ ده أنا هخليه يسف التراب. هروح دلوقتي حالا أخلص عليه وأجيبلك براءتك من تحت أسنان الكلب ده." فارس باس راسي، وخرج بسرعة من الأوضة. فضلت لوحدي. صوت الأجهزة الطبية هو الحاجة الوحيدة اللي مسموعة في الأوضة. الخوف كان بياكل قلبي. أنا مين؟ ريم ولا ليال؟ وليه طارق اختار الوقت ده بالذات عشان يكشف السر؟ عدت حوالي نص ساعة. عيني بدأت تغمض من تأثير المسكنات. فجأة.. سمعت صوت باب الأوضة بيتفتح براحة جداً. افتكرتها الممرضة، فمفتحتش عيني. بس ريحة عطر غريبة وقوية ملت الأوضة. ريحة رجالي، بس مش ريحة فارس. سمعت صوت خطوات بتقرب من السرير بخفة.. وفجأة، حسيت بإيد باردة بتتحط على بوقي تكتم أنفاسي! فتحت عيني برعب، عيني وسعت على آخرها لما شفت الشخص اللي واقف فوق راسي. كان طارق الكيلاني بشحمه ولحمه! ابتسم طارق ابتسامة شيطانية، وميل على ودني وهمس بصوت فحيح الأفعى: "فارس غبي.. سابك لوحدك عشان يروح يدور عليا، وميعرفش إني اشتريت المستشفى دي باللي فيها من نص ساعة.. ودلوقتي يا حلوة، إحنا مش هنروح النيابة.. إحنا هنروح مكان تاني خالص.. المكان اللي أختك ليلى ماتت فيه زمان.. وعشان أكون صريح معاكي، إنتي اللي هتكملي الناقص!" طارق طلع حقنة فيها سائل شفاف من جيبه، وقرب السن من رقبتي.. الرؤية بدأت تضلم تاني، وصوت صرختي المكتومة مات تحت إيده.. فارس هيقدر يكتشف غياب ريم قبل فوات الأوان؟ وإيه السر الحقيقي ورا موت ليلى اللي طارق ناوي يخلصه في ريم؟ يتبع في الجزء الرابع .... اثبـت وجـودك معانـا ب لايـك وتعليـق على الصـفـحة♥️ وتـابـع الحـلقـات كـامـلة 🎁

مقالات ذات صلة

لماذا يظهر لحم الدجاج وكأنه يحتوي على دمـ,ـاء بعد الطهي؟

حقيقة الفيديو المتداول

اهانت مديرة المطعم

اجمل ما قرأت

كرامتي مكسورة

سمير حسني “عاشق الأيتام”..نبؤة محمد فوزي قادته إلى عالم الفن ، رفض تقبيل الفنانات فتم تهميشه .. لم يخرج في جنازته فنان فعوضه الله بخروح أربعة آلاف يتيم ..

اترك تعليقاً إلغاء الرد