عادت الي الحياة بقلم عادل عبد الله الجزء1
بعد عدة أيام
يقف إيهاب يرتدي ملابسه أمام المراه ويقول لأبناؤه : انا رايح الشغل النهاردة وعارف أني سايب في البيت رجالة صح ولا لأ ؟
يوسف وسيف ” معا ” : صح يا بابا
إيهاب : أنتوا ايه ؟
يوسف وسيف ” معا ” : رجاااالة
إيهاب : طيب يا رجالة هتقعدوا تلعبوا مع بعض بس اهم حاجة مش عاوز شقاوة ومفيش حد يفتح باب الشقة لحد او ينزل الشارع فاهمين ؟؟
يوسف وسيف ” معا ” : فاهمين يا بابا .
ايهاب : و محدش يلعب في الكهربا او البوتاجاز ، ماشي يا حبايب بابا ؟
يوسف وسيف ” معا ” : حاضر يا بابا .
إيهاب : شاطرين ، عندكوا سندوتشات علشان تاكلوها كلها ، ولما ارجع لو شوفتكم سمعتوا الكلام من غير شقاوة كل واحد فيكم هياخد شيكولاته كبيرة أوي .
سيف : انا عاوز شيكولاته دلوقتي يا بابا .
إيهاب : لأ لما ارجع والاقيك سمعت الكلام ومش اتشاقيت يا سيف هجيبلك الشيكولاته .
سيف : حاضر يا بابا .
إيهاب : والتليفون معاكم هتصل اطمن عليكم كل ساعة .
يجلس إيهاب في العمل وامامه بعض الأوراق ولكنه يبدو شارد الذهن يفكر في فقدانه لحبيبة عمره وزوجته سحر ويتم اطفاله الصغار وقلقه لوجودهم في المنزل وحدهم .
يلاحظ ذلك زميله مروان فيسأله : مالك يا هوبا ؟ كل شوية تتصل بالتليفون واشوفك سرحان وبتفكر ، قولي لو فيه حاجة أحنا اخوات .
إيهاب : يوسف وسيف اول مرة اسيبهم في البيت لوحدهم وخايف عليهم .
مروان : وليه مش سبتهم عند حد من قرايبك او قرايب مامتهم الله يرحمها ؟
إيهاب : لأ يا مروان مش عايز عيالي يتربوا ويشوفوا الشفقة في عيون كل اللي حواليهم عايزهم يطلعوا أقوياء و يعتمدوا علي نفسهم .
مروان : وليه بتقول كده ده حتي علي ما اعتقد بيت حماتك جنب بيتك علطول !!
إيهاب : ايوه فعلا بس انا عارف حمايا عصبي جدا ومش عاوز في مرة ارجع من الشغل اعرف انه ضرب حد منهم معرفش ساعتها ممكن أعمل أيه !!
مروان : لكن وجود طفلين لوحدهم في البيت في السن ده خطر جدا عليهم !!
إيهاب : في الأول بس انما لما يتعودوا هيكون شئ عادي .
مروان : معلش فيه سؤال عارف أنه مش وقته لكن عندي فضول اعرف انت مش ناوي تتجوز تاني ؟
إيهاب : أنا اتجوز بعد سحر ده مستحيل !! انت متعرفش يا مروان سحر كانت ايه بالنسبالي دي كانت مراتي و أم ولادي وقبل ده كله حب عمري ومفيش في يوم زعلتني مستحيل افكر اتجوز بعدها .
ثم يرن هاتف إيهاب فيجد المتصل سيف ابنه !!!
يرد عليه : ايوه يا سيوفه يا حبيبي فيه ايه ؟
سيف : بابا عايز انزل اشتري حاجة من تحت .
إيهاب : لأ مش احنا اتفقنا الصبح ان مفيش نزول الشارع خليكم قاعدين ولما ارجع هجيبلكم كل اللي انتوا عايزينه وكمان هاخدكم ونخرج نتفسح .
سيف : حاضر يا بابا .
