عروس ابن العمدة بقلم الكاتبه إيمان

لمحة نيوز

كلها تتحمس وتلبس احسن ما عندها عشان تشوفهم حلوين ده مش معناه أنهم متصنعين!
رفع يونس عيونه فجأه وقال
مفيش الا واحده كانت علي طبيعتها
العمدة بحماس
مين ديه
يونس
كانت قاعده قدام بيتهم
العمدة
بنت مين؟
هز أكتافه بجهل
معرفش.
العمدة
متعرفش اسمها؟
لا
مسألتهاش ليه
قالتلي وانت مالك!
العمده بصدمه
نعم هي إزاي تقولك كده
رد بهدوء
طبيعي مكانتش تعرف انا مين
طيب شكلها إيه؟
مختلفة
يعني جميلة؟
مش بالطريقة اللي إنت بتفكر بيها.
العمدة
أومال؟
عندها حاجة كده…
العمدة
حاجة إيه؟
مش عارف حسيت انها مختلفه
شكلها،طريقه كلامها،عفويتها
ضيق العمده عيونه بشك وقال
كانت قاعده قدام بيتهم ماسكه طبق حلاويات بتاكل منه!
يونس بأستغراب
ايوه انت تعرفها
العمده بسخريه
ملاقتش غير ديه يابني
دي كيان بنت الحج محمود
ليل نهار قاعده قدام بيتهم بتاكل الاخضر واليابس
يونس بفضول
متعلمة؟
هز العمده رأسه
اه معاها ليسانس اداب تاريخ مدرسه دراسات كمان في المدرسه الابتدائية اللي علي اول القرية
ابتسم وبص قدامه وقال بجديه
انا عايزها
ايوه يابني بس…..
قاطعه بهدوء
عارف أنها تخينه
بس انا مبيفرقش معايا الشكل
قد ما بيفرق معايا الجوهر
البنت عجبتني ومش عايز غيرها
ياكده يأما مش هستلم العموديه ولا هتجوز وهرجع سويسرا تاني
العمده بتوتر وسرعه
لا وعلي ايه خلاص نروح نخطبهالك
بس بشرط
ايه هو
بص قدامه وقال بخبث
هفضل مجهول
بمعني!
رجع بصله وقال بجدية
يعني هيروح معاك سيف صاحبي علي اساس انه ابنك زي ما الكل فاكر
وليه يابني كل ده
لو سمحت يابابا أنا عايز كده ارجوك احترم رغبتي
بس احنا كده بنخدع الناس وده مش حلو في حقي!!!
اتنهد وقال بتعب
فتره مؤقته بس يا بابا وبعدين كل حاجة هتبان
هز العمده رأسه بيأس
والله يابني مانا فاهم ايه اللي في دماغك بس ماشي اللي يريحك هعمله
تاني يوم الصبح…
كانت كيان واقفة قدام المرايا، ماسكة المشط في إيدها، وباصّة لنفسها.
حطت إيدها على شعرها
يعني لو السحر اشتغل… أنا هبقى جميلة؟
ردت فوزية من وراها
طبعًا.
كيان
طب ولو مشتغلش؟
هيشتغل.
متأكدة؟
ان شاء الله يشتغل وابن العمده يشوفك وتعجبيه ويتقدملك
كيان بشرود
طب ولو ده حصل فعلاً مش انا ابقي كده بخدعه
تخدعيه ليه ياحبيبتي أنتِ فعلاً جميله
مش هتخدعيه في انك جميله
كل الفكره ان السحر هيخليه ينتبه لجمالك ويشوفك دوناً عن كل البنات اللي حواليه
كيان والدموع بتلمع في عيونها
بس انا مش جميله ياماما
فوزية قربت منها بحزن
انتِ جميلة يا كيان.
كيان
الناس مش شايفة كده.
الناس مش دايمًا عندها حق.
اتنهدت وسكتت وفجأه سمعوا
صوت ابو كيان برا
فوزية!
فوزيه بأستغراب
ده صوت أبوكي
ايه اللي جابه من الشغل بدري كده
طلعت هي وكيان يجروا علي برا بلهفه وقلق
محمود وهو بينهج
العمدة جاي!
شهقت فوزيه بذهول
جاي هنا؟!
أيوه
ومعاه ابنه!
جايين يطلبوا ايد كيان لأبن العمده!!!!!
فوزيه بفرحه
لولولولولولي بركاتك يا شيخ مُسعد
ادخلي يابت اجهزي بسرعه
شويه ودخل العمدة بخطوات واثقة، وراه شاب وسيم لابس جلباب صعيدي ملامحه هادية وبشوشة
خرجت كيان وبمجرد ما وقعت عينها عليه، اتجمدت في مكانها.
وبصتله بذهول
ده مش هو! مش هو الشاب اللي كان في خيالها
ده شخص تاني خالص
شخص عادي جدا
مش مبهر!
زغرطت فوزيه وهي بتستقبلهم
لولولولولي أهلاً يا عمدة
أهلاً يا ابن العمدة
نورتوا البيت والله
العمده بتحفظ وهدوء
منور بأهله
محمود بتوتر
اتفضل ياعمدة
اتفضل يا سعاده البيه
قعد العمدة على الكرسي، والشاب اللي معاه قعد جنبه بهدوء.
فوزية كانت واقفة قدامهم وهي مش عارفة تخبي فرحتها، بينما كيان فضلت واقفة مكانها، عينيها على الشاب بتمعن
محمود قال بتوتر
نورت يا حضرة العمدة
العمدة ابتسم
ربنا يخليك يا حج محمود.
وبص للشاب اللي جنبه
ابني يونس
محمود بنبره مهزوزة
ا أهلاً وسهلاً يا سعاده البيه حمد لله علي السلامه
ابتسم ورد بهدوء واحترام
الله يسلمك يا حج محمود
فوزية بأبتسامه واسعة
بسم الله ماشاء الله وشك ده ولا وش القمر!
يونس بابتسامه مصطنعه
تسلمي ياحجة
فوزيه بحماس
كيان بنتي عندها 23 سنه
بياض ايه وجمال ايه وعيون ايه
ولا في النظافه بقي ياسعادة البيه مقولكش
و….
محمود بنبره حادة
فوزززيه
بلعت ريقها وردت بابتسامه مهزوزة
ايه يا خويا بعرفهم علي مميزات البت!
اتنهد العمده وقال بهدوء
إحنا جايين نطلب إيد كيان لابني يونس يا محمود رأيك ايه
سكت محمود شويه من الذهول
هو كان في اعتقاده لحد اخر لحظه أن العمده جاي لشيئ تاني
غير أنه يطلب ايد بنته زي ما اتقاله!
العمده بجديه
ساكت ليه يا محمود
مش موافق ولا ايه
فوزيه بلهفه
لا لا مش موافق ايه
موافق طبعاً
هو مصدوم بس شويه
من الصدمه مش قادر ينطق و….
قاطعها محمود وهو بيبص العمده بهدوء وجدية
ليه ياحضرة العمدة
العمده بأستغراب
هو ايه اللي ليه؟
اشمعني بنتي
هز العمده أكتافه
ابني شاف بنتك وعجبته
محمود بنفس الجديه
شافها فين وامتي وعجبه فيها ايه
العمده برفعه حاجب
ده تحقيق!
فوزيه بتوتر ونبره مهزوزة
لا لسمح الله لا محمود ميقصدش
هو قصده…..
قاطعها محمود بنبرة حاده وصارمة
ادخلي جوا يا فوزيه
بس….
قولت ادخلي جوا يافوزيه
بلعت ريقها بخوف خاصه لما زعق فيها بصوت اعلي ودخلت اوضه كيان
دخلت فوزية أوضة كيان وهي بتبص لجوزها من بعيد بغيظ وخوف، لكن أول ما قفلت الباب عليها، قربت من بنتها وهمست بفرحة وحماس
شوفتي يابت الشيخ مسعد قالك السحر هيبدأ مفعوله بعد تلات أيام، أهو اشتغل في أقل من تلات أيام!
كيان وهي بتفرك ايديها بتوتر
انا مش مصدقه حاسه اني بحلم
لا مبتحلميش العمده وابن العمده قاعدين برا مع ابوكي بيطلبوا ايدك وطاقه القدر هتتفتحلك يابت ياكيان،هتعيشي في عز ورفاهيه،هيبقي عندك فلوس ولبس واراضيى وخدامين و…..
قاطعتها كيان بنبرة حزينة
لفتره مؤقته ياما
ليه بتقولي كده يابت اتفائلي خير
سكتت كيان لحظة، وبعدين قالت بشرود
لما ابن العمده يعرف الحقيقه ويشوف شكلي الحقيقي هيطلقني ويرميني في الشارع و….
شهقت فوزيه وضربتها في كتفها بغيظ
ماله شكلك الحقيقي
ليه محسساني انك الساحرة الشريره
هو ابن العمده كان يطول يتجوزك من اساسه
ابتسمت كيان بسخريه ومردتش عليها
قربت فوزيه من الباب تحاول تسمع اللي بيتقال
وفجأة سمعت صوت محمود من بره
كيان!
اتنفضت بسرعة وفتحت الباب
ايوه يابو كيان
محمود بغيظ وهو بيبصلها
انا بقول كيان مش ام كيان
فوزيه بتذمر
جرا ايه ياراجل هو انا حد غريب ده انا امها!!
دفعها دفعه بسيطه ودخل الاوضه سحب كيان من ايديها
تعالي يابنتي
وقفت كيان وهمست بخوف
هنروح فين
محمود بأستغراب
تعالي يابت مالك خايفه ليه ابن العمده هيتكلم معاكي شويه ولو في قبول نقرأ الفاتحه
م مش خايفه ب بس اصلك يعني اصل
مش عارفه هقول ايه ولا هتكلم في ايه
ردت فوزيه بسرعه
قولي أي حاجة، المهم متبوظيش الجوازة!
خرجت كيان وهي متوترة، وقفت عند باب الصالة.
همست بخفوت
السلام عليكم
ابتسم العمده بتكلف وضيق
وعليكم السلام ورحمه الله
نزلت عينيها في الأرض ودخلت قعدت علي اقرب كُرسي وهي بتفرك ايديها بتوتر
العمدة بص ليونس وهمسله بضيق
اعمل فيه ايه الواد ده ملاقاش غير البرميل ده!
ابتسم يونس المزيف بهدوء وبص لكيان
بس جميله
محمود ضيق عينيه
انت كمان يا سيف بتقول كده
هز رأسه وهمس بنفس الهدوء
هي الوحيده اللي خطفته
وبعدين مش بالشكل ياعمي
كيان قعدت قدامهم وهي متوترة، ومش عارفة تبدأ منين.
بصت لأبوها، لقت عينه عليها كأنه بيقولها اتكلمي!
أخدت نفس عميق، وبصت للشاب اللي قدامها
ممكن أسألك شوية أسئلة؟
هز راسه بابتسامه بسيطة
طبعًا.
أول حاجة… إنت شوفتني فين؟
اتوتر للحظة، وبص للعمدة
العمدة كتم ابتسامته وهمس
قولها امبارح قدام بيتكم
رجع سيف بص لكيان
شوفتك امبارح.
فين؟
قدام بيتكم.
كنت بعمل ايه
بتاكلي
فوزيه بهمس
منك لله علي طول بوقك شغال!!
رفعت كيان حاجبها
كنت باكل ايه
حلاويات
اممممم
طيب عندك كام سنة؟
سبعة وعشرين.
كيان
وشغال إيه؟
شغال مع أبويا.
يعني هتشتغل في العمودية؟
غالبًا.
غالبًا؟
سكت سيف لحظة، وبعدها قال
أنا كنت عايش بره فترة طويلة، ولسه راجع من سويسرا.
كيان
وهتستقر هنا؟
سيف اتوتر شوية.
لأن السؤال ده بالذات هو اللي مش عارف يجاوبه.
بص للعمدة بطرف عينه، وبعدها رجع لكيان
أيوه.
نهائي؟
أيوه، نهائي.
كيان
مش هترجع سويسرا تاني؟
لو رجعت… هتكون زيارة بس.
ابتسمت كيان لأول مرة براحة.
كويس.
سيف
ليه كويس؟
عشان أنا مش حابة فكرة إن جوزي يبقى عايش في بلد وأنا في بلد تانية.
هز رأسه بتفاهم
ااه
سكتت لحظة، وبعدين سألت
طب لو اتجوزنا… هتخليني أشتغل؟
رد من غير تردد
لو إنتِ عايزة تشتغلي، طبعًا.
رفعت عينيها باستغراب
بجد؟
بجد.
مش هتقولي لا
واقولك لا ليه
ي يعني ع عشان انا مراتك
وانت هتبقي العمدة
و…..
الشغل مش عيب وبعدين أنتِ شغاله مدرسه
اه و بحب شغلي جدا
يبقى تكملي فيه.
كيان ابتسمت ابتسامة صغيرة.
اما عن فوزية كانت واقفة بعيد، بتبص لبنتها وتكاد تطير من الفرحة
كملوا كلام،وكانت مع كل سؤال يتبعها اجابه راقيه منيونس في اعتقادها قلبها يهدي وعقلها يتفق معاه
دقائق وكانت البهجة والفرحة طاغيه علي المكان
وافقت بكل رضا
اتفقوا علي معاد كتب الكتاب والفرح بعد اسبوع
كل شيئ عدي بسرعه البرق
علي الرغم من موافقتها وعلي الرغم من ارتياحها
الا ان كان في جزء جواها خايف،قلقان،حاسس بالخطر!
بعد أسبوع
جه اليوم اللي البلد كلها كانت مستنياه
يوم فرح ابن العمدة علي كيان أقل بنت في البلد جمال!
من الصبح والقرية مقلوبة، الزغاريد مالية المكان، والرجالة متجمعة قدام دار العمدة، والستات كل واحدة بتقطم في بنتها وبتحقد علي كيان اللي قدرت تخطف قلب ابن العمدة من بين كل بنات البلد بدون اي مجهود!
في دار العمدة…
كان سيف واقف وسط الرجالة، لابس جلباب صعيدي وكل الناس حواليه بتبارك له
قرب منه وحد من رجاله البلد بحماس
الف مبروك يابشمهندش
سيف بابتسامه مصطنعة
الله يبارك فيك ياعم حسام
الراجل بأستغراب
بس بصراحة اختيارك كان غريب.
رفع سيف حاجبه بتساؤول
ليه؟
يعني كان قدامك بنات البلد كلها
جمال ايه وحلاوة ايه وجسم ايه
وفي الاخر تختار كيان!!
وهنا اتدخل يونس ورد بأنفعال
ومالها كيان
الراجل بأستغراب
مين حضرتك؟
سيف بتوتر
د ده…..
قرب منه يونس خطوه وهمس بنبرة حادة
ابن العمدة
الراجل بذهول
وه ك كيف ده اومال….
حط يونس أيده فوق كتفه وضغط عليه ضغطه قويه وهمس بنبرة كلها تحذير
لو حد عرف متلومش الا نفسك
بلع الراجل ريقه بتوتر وهز رأسه بنفي
ل لا لا يا سعادة البيه والله ما حد هيعرف واصل
هز رأسه بابتسامه مصطنعة وبعد عنه وكمل بهدوء
عايز تكمل الفرح تقف ساكت متجبش سيره مراتي علي لسانك!
ح حاضر ا انا انا اسف
ثواني واختفي من قدامه وخرج من القصر كله وهو بيرتجف
سيف برفعة حاجب
وده من ايه؟
بصله يونس ببرود
ايه؟!
انت حبيتها ولا ايه؟
هز يونس أكتافه ببرود واستنكار
لا بس مهما كان هتبقي مراتي وانا مسمحش لحد يتكلم عنها
اومال اختارتها ليه
لانها مختلفه
ازاي
هي الوحيده اللي محاولتش تلفت انتباهي
يعني اختارتها علشان كده بس!
ايوه
طب ومصير علاقتكم هيكون ايه
هز أكتافه بجهل
معرفش
يونس مش شايف أن البنت ديه هتتظلم معاك
ليه
رفع سيف حاجبه
انا وانت عارفين ليه
انا عارف انك طاوعت أبوك في كل ده عشان تاخد فلوس وترجع علي سويسرا تاني
بص يونس حواليه يمين وشمال بتوتر
بس اسكت الله يخربيتك هتفضحنا
اتنهد سيف وبصله بحزن
البنت طيبه حرام عليك
يونس بغيره حاول يداريها
انت حبيتها ولا ايه
هز رأسه وابتسم ابتسامه باهته
اكيد لا انت اكتر واحد عارف اني محبتش ولا هحب الا روز مراتي الله يرحمها
يونس بحزن
الله يرحمها ا انا مقصدش انا انا بس….
سيف بمرح وهو بيغمزله بعيونه
الظاهر انك وقعت يا شاطر
يونس بعند
لا طبعا
هنشوف
اتنهد تنهيدة طويله ورفع رأسه تلقائياً لفوق ناحيه شباك الأوضه اللي هي بتجهز فيها
سيف بسخرية قبل ما يمشي من قدامه
واضح فعلاً انك موقعتش!!
بصله بنظره ناريه من ظهره وهو بيجز فوق أسنانه وبيهمس
مستحيل،اكيد لا
مش من بين كل بنات العالم قلبي يقع في حُب دي!!!!!
فوق في الأوضة اللي بتجهز فيها كيان
كانت متحاوطة بناس كتير
مامتها وام يونس
صاحبتها ريماس
اهل يونس البنات كلهم
والبنت اللي بتجهزها
بلعت ريقها بصعوبه وهي بتبص حواليها بتوتر وأرتباك بلغ عنان السماء!
ريماس بهمس
انتِ كويسة؟؟
هزت راسها بنفي وردت بصوت مخنوق
لا
ضغطت فوق كتفها ضغطة بسيطة
اهدي متخافيش انا معاكي
مالك ياعروسة متوترة ليه كده وشكلك مش مبسوط؟؟
قالتها عبير بنت خال يونس بغل وسخريه وكُره
اخدت كيان نفس عميق وردت بهدوء
مين قال كده يا عبير اكيد مبسوطه مش النهارده فرحي
ابتسمتعبير بسخرية
حقك طبعاً تتبسطي
دقائق وتبقي مرات ابن العمدة
وقفت كلام وبصتلها من فوق لتحت
حلم طبعاً بالنسبالك مكنتيش متخيله يتحقق
لوت بوقها وكملت
بس الدنيا حظوظ بقي
يالا ربنا يهني سعيد بسعيدة
بعدت كيان ايد البنت اللي بتحطلها ميك اب وقامت وقفت ربعت ايديها في بعض ببرود وقالت
ومين قالك أن ابن العمده كان حلم بالنسبالي!
لعلمك بقي هو مكانش في دماغي اصلاً
ولما عرفت أنه رجع من السفر مهتمتش
معملتش زي ناس وروحت عند الكوافير بالساعات اغير في سحنتي عشان اعجب!
قربت منها بأبتسامه خبيثه
وبعدين ياروحي زي ما بتقولي الدنيا حظوظ
وانا حظي طلع جميل الحمد لله عشان انا سالكة مش حربوقة
ويا بخت ابن العمده بيا والله
هيلاقي فين حلاوة طعامة نغاشة بالشكل ده غير عندي
فوزيه بفخر
بنتي تربيتي لولولولولولولي ربنا يسعدك ياحبيبتي ويبعد عنك الحرابيق
ريماس بهمس وذهول
انا مصدومة
كيان بهدوء
ليه
انا عمري ما شوفتك بتتكلمي بثقه كده
رفعت عيونها في عيون ريماس وابتسمت ابتسامه شريرة
من النهارده هتشوفي كيان تانيه خالص
مش بتخاف،ولا مكسورة
ريماس بفرحه وهي بتضمها
انا مبسوطه بيكي اوي وبحبك اوي
ابتسمت كيان ابتسامه باهته وهي بتبادلها الحضن
وانا بحبك اوي
في المساء
كان صوت المزمار بيرن في دار العمدة
الستات رايحه جايه تحط في اكل
والرجاله بتحطب
فجأه وقف المزمار والدنيا هديت
اتنحنح العمدة وبدأ يتكلم بخشونة
اولاً بشكر كل اللي قدرني وحضر
ثاني حاجه انا عايز اعترفلكم بحاجة
الكل انتبهله بفضول
وقتها اخد نفس عميق وكمل كلام وهو بيشد يونس من أيده
ده يونس ابني
وه كيف
اومال مين ده
بدأت الاسئله تتوالي فضرب الارض بالأبنوس بتاعه
محدش يتكلم
سكت الجميع بأحترام فكمل كلامه
طبعاً الكل عارف أن يونس ابني كان بيدرس برا في سويسرا
ومكانش ناوي يرجع علي هنا ولا كان ناوي يتجوز من هنا
بس مع إصراري أنه يرجع ويستقر مقدرش يرفضلي طلب
ولما طلبت منه يختار عروسته بنفسه قالي أنه حابب يختارها بدون قيود ولا تعقيدات،علشان كده قررت اختار بديل تاني يمثل دور ابني علشان هو يقدر يختار بنت مناسبه تخطفه من غير اي مجهود يُذكر،وبالفعل هو اختار كيان بنت الحج محمود والست فوزيه
بص لمحمود اللي كان واقف متنح ومش قادر يستوعب
انا اسف ياحج محمود انا خدعتكم كلكم بس دي كانت رغبه يونس!
محمود ببلاهه
يعني انا دلوقتي بنتي هتتجوز مين
رد يونس بهدوء
هتتجوزني انا ياحج محمود
ايوه بس بس
انا عارف ان حضرتك مصدوم
بس صدقني انا شوفت بنتك وحبيتها