عروس ابن العمدة بقلم الكاتبه إيمان

بصت له للحظة، وبعدين لفت وشها بعيد.
بلع ريقه، ونزل عينه للأرض
أنا آسف…
أقسم بالله العظيم أنا آسف ومكانش قصدي ولا كلمه من اللي قولتلها ومش هسافر تاني ا أنا أنا بس اتعصبت والدم غلي في عروقي لما قولتي انك حبيتي صاحبي!!!
اتقدم محمود ناحيته بعصبية، وقبض على قميصه
انت فاكر نفسك عشان أبوك عمدة البلد هتيجي تكسر خاطر بنتي وتدوس على كرامتها وانا هسكتلك يابن العمده لااااااا فوق كده واعرف ابوها يبقي مين؟!
شد محمود القميص اكتر وفضل يهز فيه
دي بنت محمود الفيومي الوحيده دي عزوتي وظهري! والكلام اللي قولته وجرحت بيه بنتي… لو فاكر إن منصب أبوك هيحميك منه تبقى غلطان ولو فاكر انك تقدر تاخدها غصب برضو تبقي غلطان
مقاومش، ولا حتى حاول يبعد إيده.
بالعكس نزل راسه باحترام وقال بنبره هاديه ، كلها ندم
حقك على راسي يا حج محمود.
رفع عينه لكيان، وصوته اتكسر
وحقها هي كمان على راسي… بس أنا مش جاي أخدها غصب
زقه محمود بعيد عنه بعصبية
أومال جاي تعمل إيه؟!
رفع يونس عينه لكيان، وقال بهدوء
جاي أقولها إني مش هطلقها.
اتسعت عيون كيان بصدمة، وهزت راسها بعدم تصديق
لا هتطلقني
قرب منها خطوة وقال بأصرار
مش هطلقك يا كيان.
ضحكت ضحكة قصيرة مليانة مرارة
وإنت فاكر إن القرار قرارك لوحدك؟!
لأ.
أومال؟
أنا بطلب منك فرصة
كيان بعصبيه
انا مش عايزاك ولا عايزه الفرصه

دي
وانا عايزك وشاريكي
محمود اتدخل بغضب
وهي قالت إنها مش عايزاك.
يونس بصله باحترام
وأنا سامعها يا حج.
رجع بص لكيان
بس أنا مش هقدر أطلقها وهي مينفعش تحكم عليا من مجرد غلطه
كيان قربت خطوة، ودموعها لسه في عينيها
غلطة؟!
صوتها ارتعش
انت فاكر اللي قولته غلطة عابرة؟!
سكت فكملت بقهر
انت عارف أنا كنت إيه قبل ما أتجوزك؟
كنت واحدة مش واثقة في نفسها… كل كلمة وحشة اتقالتلي كنت بصدقها.
حطت إيدها على قلبها
جيت إنت في اليوم الوحيد اللي كنت حاسة فيه إني أخيرًا حد اختارني… وقلتلي نفس الكلام اللي أنا طول عمري بخاف أسمعه.
سكت لحظه بعدها اتنهد
مش هطلب منك تسامحيني دلوقتي
هفضل مستني.
كيان بصتله بذهول
مستني إيه؟
اليوم اللي هتسامحيني فيه وتقرري ترجعي
ردت كيان بشراسه وكبرياء
اليوم ده مش هييجي.
اتنهد محمود وقال بحزم
بنتي مش هترجعلك
الافضل ليك وليها تطلقها من غير شوشره
هز رأسه بنفي
انا مش هطلق
هتطلق غصب عنك يابن العمده!
أعصابه فلتت المرة دي وعلي صوته
مش هطلق
لأول مرة ظهر الوجع في عينيه بوضوح
انا اتجوزتك وأنا فاكر إني بختار واحدة مستحيل أتعلق بيها.
سكت لحظة
بس اكتشفت إني كنت غبي.
كيان ردت بسرعة
واكتشفت ده إمتى؟ بعد ما جرحتني؟!
يونس كمل
أنا كنت فاكر إني أقدر أتحكم في كل حاجة… أختار مين أحب ومين ماأحبش، وأقرر مين يدخل حياتي ومين يخرج منها.
ابتسم بمرارة
بس إنتِ الوحيدة اللي مخلياني مش عارف أتحكم في أي حاجة.
كيان بصتله للحظة، لكن سرعان ما لفت وشها.
الكلام ده مش هيغير حاجة.
عارف.
وأنا مش راجعة.
عارف.
ومش هسامحك بسهولة.
عارف.
ابتسم ابتسامة صغيرة
المرة دي أنا مش جاي أجادلك.
سكتت ورجع خطوة للخلف
خليها عندكم يا حج محمود.
فوزية اتدخلت لأول مرة، وكانت مترددة
يعني إيه؟
يعني مراتي تفضل في بيتها لحد ما هي بنفسها تقرر ترجع.
كيان بصتله بسرعة.
بس…
قاطعها
من غير ما حد يضغط عليها.
بص لمحمود
لا حضرتك، ولا أبويا، ولا أمي، ولا أي حد.
محمود هدي شوية، لكنه قال بصرامة
ولو قررت متجيش؟
يونس سكت لحظة.
وبعدين قال
مش هبطل احاول عشانها لأنها تستاهل
لف وراح ناحيه الباب فتحوا
وقبل ما يخرج، وقف وبص لها
تصبحِي على خير
مردتش عليه انما بصتله بعتاب ووجع والدموع متعلقه في عيونها!
قفلت فوزية الباب وراها، وبمجرد ما لفت لكيان، لقتها واقفة مكانها بتبص للباب.
قربت منها فوزيه وقالت
كيان
كيان قاطعتها
ماما متقوليش حاجة.
بس…
أنا تعبانة.
دخلت أوضتها وقفلت الباب وراها، وسندت ضهرها عليه.
وهمست لنفسها بوجع
أنا مش هرجعله
استحاله ارجعله
حتي لو ….
غمضت عيونها شويه ونزلت دمعه
حتي لو كان هو ده الشخص اللي اتمنيته!.
بعد ما خرج يونس
كان سيف مستنيه
أول ما شافه قرب منه بتوتر
عملت إيه؟
هز أكتافه بندم
ولا حاجه
سيف بعتاب
انت جرحتها
بصله بضيق
خلاص يا سيف عرفت!
طب هتعمل إيه دلوقتي؟
هز رأسه بحيره
مش عارف
يونس انت مش عايز تطلقها ليه
رد بشرود
برضو مش عارف
ابتسم سيف وحط أيده فوق كتفه
بتكابر ليه يابني
ما تقول انك ارتاحتلها
انا مستغرب انا كنت جاي هنا عشان اخد فلوس من ابويا عشان اقدر اقف علي رجلي من تاني بعد ما خسرت كل فلوسي في صفقه فاشله وارجع علي سويسرا
فجأه لاقيته بيساومني امسك العموديه واختار عروسه واتجوز يأما مفيش فلوس
لاقيتني بختار واحده مختلفه تماماً عن كل البنات
واحده عارف انها مش ممكن تأثر فيا،بس بس
سيف بهدوء
انقلب السحر علي الساحر!.
كمل يونس بشرود
لاقيتني بتشد ليها من غير ما احس
لاقيتني براقبها،مرتاحلها،عايزها تكون مراتي
كل مره حاولت اكذب نفسي وأقنع نفسي انها مجرد لعبه وتنتهي بفشل،مش فاهم ازاي من بين كل بنات العالم دي اللي شدتني دي اللي دموعها كسرت قلبي ودي اللي عايزها تفضل طول العمر في حياتي!!!!
ازاي وامتي مش فاهم حاجه
انا مكملتش اسبوع اعرفها
لحقت أمتي اتعلق بيها
ولحقت أمتي احبها
رفع رأسه وسأل سيف بتردد
اكيد كل ده اوهام صح
سيف بهدوء
لا مش صح
الحب عمره ما كان اوهام
ولا المشاعر والارتياح في وجود شخص معين عمره ما كان وهم!
يونس
يعني معقوله دي تكون مشاعر حقيقيه!
سيف
معقوله جدا طبعاً
انا مش هرجع سويسرا
فتح سيف عيونه بصدمه
نعم
بص قدامه وهمس بأصرار
مش هرجع إلا وكيان معايا
هتحاول؟
هحاول
مش هتمِل!
اللي بيحب عمره ما يمِل ياصاحبي
سيف بهزار
عيشت وشوفت قلبك شغال يا صاحبي!!
يونس بأبتسامه هاديه
يوم ما دق
دق لبنت عاديه جداً بل أقل من العاديه في نظر الكل
لكن في نظري كانت اجمل ما شافت عيوني
ولما هي جميله ليه قولتلها الكلام ده يا يونس!
رد بشراسة
من غيرتي
سيف
ده أنت وقعت وقعت يعني
يونس
الظاهر كده
طب ايه ناوي علي ايه
اخد نفس عميق وبص ناحيه باب بيتها اللي مازال واقف قدامه
ناوي أظهرلها فين ما راحت
ناوي اثبتلها أنها تستاهل تتحب من غير سحر ولا مجهود منها
عدي اسبوع
رجعت كيان لشغلها في المدرسه
في الأول كانت كل البنات والستات في القرية بيتكلموا عنها وعن أنها مكملتش يوم متجوزة اكيد في لُغز!
لكن كيان كانت كل مرة تسمع الكلام، ترفع راسها وتمشي.
وفي يوم…
كانت خارجة من المدرسة، لقت عربية سودا بتقف قدامها وبتقطع عليها الطريق
نزل منها يونس
اتوترت أول ما شافته وكانت هتمشي لكنه وقف قدامها ونزل رأسه
كيان
ردت بضيق
افندم عايز ايه
يونس بهدوء
خلصتي شغل؟
كيان بشراسة
انت شايف ايه
ممكن أوصلك؟
هزت راسها بنفي
لا طبعا توصلني بصفتك مين؟!
رفع حاجبه
بصفتي جوزك مثلاً!
بلعت ريقها ووشها احمر وبصت في كل الاتجاهات
لو سمحت ابعد عن طريقي أحنا كده كده مسأله وقت ونتطلق
ابتسم ابتسامه بارده وقال
مسأله وقت وكل شيئ اتكسر هيتصلح ونرجع
حطت ايديها فوق قلبها وابتسمت ابتسامه مكسورة
اللي اتكسر قلبي
بصلها بحزن
حقك عليا
لو سمحت ابعد عني انا مش عايزاك
وانا عايزك ومش هبطل احاول
ودلوقتي يالا خليني اوصلك
لا عن اذنك
اتخطته ومشت من جنبه لكن فجأه لاقت نفسها مرفوعه عن الأرض فصرخت برعب وخوف
همس جنب ودنها
انا مبحبش اكرر كلامي كتير
واضح انك عنيده بس انا اعند منك!!
كان شايلها من وسطها،ظهرها قدام صدره ورأسه جنب ودنها بيهمس بنبرة دافيه
كيان بتوتر وهي بتبص حواليها
ا انت اتجننت ايه اللي انت بتعمله ده الناس كلها بتبص علينا
لف وراح ناحيه العربيه وهو لسه شايلها ورد بأستفزاز
عادي واحد ومراته هما مالهم
حركت رجلها في الهواء وحاولت تفلت منه لكنه احكم قبضته علي وسطها وهمس
بطلي تتحركي والا اقسم بالله هفضل شايلك وواقف بيكي أن شالله حتي اقف ساعتين وخلي اللي رايح واللي جاي بقي يتفرج
بلعت ريقها بتوجس
ط طب نزلني ارجوك
هنزلك بس بشرط
ايه هو
تركبي معايا؟
هركب والله خلاص
نزلها يونس بهدوء، لكن قبل ما تلمس رجليها الأرض كان فاتح باب العربية.
اتفضلي.
كيان عدلت عبايتها بسرعة وبصتله بغيظ
إنت بني آدم مستفز على فكرة.
ابتسم
شكراً
ومجنون.
ربنا يسامحك
و و قليل الأدب!
ضحك وهو بيقفل لها الباب
معروفه من زمان
بصت قدامها وهي بتنفخ بضيق، وركب هو الناحية التانية.
أول ما العربية اتحركت، قالت من غير ما تبصله
متفتكرش إن ركوب العربية معاك معناه إني سامحتك.
عارف.
ولا معناه إني هرجعلك.
ماشي
لفت تبصله بغيظ
انت عايز مني ايه
ابتسم وهو مركز في الطريق
عايزك!
اتوترت وقلبها دق وردت بتلعثم
و وانا مش عايزاك
سكت وهي كمان سكتت وبعد لحظات قالت
نزلني هنا.
لسه بيتكم بعيد.
ماشي نزلني هنا برضو
ليه؟
عشان مش عايزة حد يشوفني نازلة من عربيتك.
بص لها بطرف عينه
ليه؟
مش عايزة الناس تقول إني رجعتلك وتوقف حالي
رفع حاجبه بغيره
افندم اوقف حالك!!
وانتِ فاكره أن ممكن حد يبصلك أصلاً
بلعت اهانته وبصت قدامها وسكتت لحظه
وقتها أدرك اللي قاله
ا انا انا مقصدش اللي في دماغك والله انا…..
قاطعته بحشرجة في صوتها
من فضلك نزلني
وقف العربية لكن قبل ما تنزل مسك ايدها وقفل الباب
اقسم بالله ما قصدي
انا اقصد أن محدش يقدر يبصلك لانك مراتي
مرات العمده
وهما عارفين أن لو حد بصلك هفقع عيونه!
مقصدش اللي في دماغك
اخدت نفس عميق وسكتت لحظه بعدها قالت بهدوء
طب من فضلك أنا عايزه انزل
هز رأسه بأستسلام
اتفضلي
نزلت وقبل ما تمشي قالها
كيان
افندم
خلي بالك علي نفسك
ملكش دعوه ومتجيش تاني عند شغلي
قفلت الباب بعنف ومشت
فضل يبصلها من بعيد، وابتسم وقال في نفسه
ان كنتِ عنيده فأنا أعند منك ونفسي طويل!

تاني يوم…
خرجت كيان من المدرسة، لقت عربية يونس بتقف قدامها
غمت عينيها بغيظ
يا رب صبرني.
نزل يونس بأبتسامته المستفزة
مساء الخير
خير جاي ليه تاني
اركبي.
مش راكبة ومتعملش زي امبارح لأني المرة ديه اخدت كل احتياطاتي!
فعلاً اللي هي ايه بقي؟
هزت أكتافه ببرود
جرب تلمسني وانت تشوف
اتنهد وقال بهدوء غريب
مش هقرب منك
انا بس جيت اديكي ديه
بصت للكيس اللي كان في أيده برفعه حاجب وسألته بسخرية
ايه ده
افتحيه وشوفي
بصتله شويه بعدها شدت منه الكيس بعنف وفتحته
كان عباره عن طبق حلاويات من اللي بتعشقها
ريحتها اخترقت مناخيرها
بالمناسبه انا اللي عملتهم
بلعت ريقها بصعوبه وقالت بنبرة مهزوزة
كذاب
والله أبداً انا اللي عملت كل ده
انت بتعرف تعمل حلاويات؟
توء
اومال
روحت المصنع ووقفت مع الشيفات جوا وصفولي الطريقه وعملت كل صنف خطوة بخطوة فضلت واقف خمس ساعات بحاول وبفشل وبحاول وبفشل لحد ما وصلت للطعم المظبوط
ردت بهدوء عكس المعتاد
وكل ده ليه
علشانك
اخدت نفس عميق وحطت الكيسه فوق العربيه وردت بكبرياء
لو فاكر انك ممكن تصالحني بشويه حلاويات تبقي غلطان يا بشمهندس،انا اه بحب الأكل واه بضعف قصاد الحلاويات واه مش قادره اعمل رجيم وكل مره بفشل لاني مدمنه اكل لكن بحب نفسي وكرامتي اهم من اي حاجه في الدنيا
سكتت لحظة بعدها قالت
ياريت توفر علي نفسك ومتحاولش لاني مش هسامحك ومش هرجعلك،ياريت لو عندك كرامه طلقني
غمض عيونه بتعب وهز رأسه بأستسلام
تمام يا كيان هطلقك
النهارده بليل هجيب المأذون وهطلقك
هزت راسها بأبتسامه ساخره ومشت من قدامه وهي بتقول لنفسها
واضح فعلاً انك هتحاول علشاني
كل شخص كمل في طريقه وبالفعل جه الليل وجابيونس معاه المأذون والعمده وتم الطلاق رسمي
بعد مرور تلت شهور…
وبعدين يا كيان كملي
خرجت كيان من شرودها وبصت للدكتور النفسي اللي قررت تروحله
وبعدين رجع يونس تاني علي سويسرا
الدكتور
محاولش مره تانيه
هزت راسها بابتسامه حزينه
ولا مرة
الدكتور
طب أنتِ زعلانه أنه مشي
كيان بوجع
انا زعلانه علي نفسي اوي
الدكتور سكت لحظات، وبعدها سألها بهدوء
زعلانة على نفسك ليه؟
نزلت عينيها للأرض، وفضلت تحرك صوابعها بتوتر
عشان ضيعت سنين من عمري وأنا مخليه كلام الناس يأثر فيا
طول الوقت شايفه نفسي مش جميله ولا مرغوبه ولا ناجحة وطول الوقت بحاول اراضي الناس علي حساب نفسي ويحاول اثبتلهم أن البني آدم مش بشكله بل بأخلاقه وطيبته وقلبه!!
ابتسمت ابتسامة باهتة وكملت
بس اللي اكتشفته أن الناس عمرها ما هترضي عني
مش لاني وحشه زي ما انا فاكره
لان دي فطرتهم اللي اتربوا عليها
مهما عملت ومهما حاولت ومهما بينت احسن ما فيك مش هيرضوا عنك برضو!
ودي أهم نقطة وصلنالها من أول ما بدأنا.
بصتله باستغراب
يعني إيه؟
يعني مش يونس بس اللي كسر ثقتك في نفسك يا كيان ووصلك للحاله ديه
أمال مين؟
إنتِ.
اتجمدت مكانها فكمل بهدوء
انتِ اللي صدقتي كلام الناس وأنتِ اللي استسلمتي وأنتِ اللي حددتي إن الجواز من راجل وسيم أو غني أو ابن عمدة هو الدليل الوحيد إنك جميلة ومحبوبة!!
نزلت دمعة على خدها وهمست
بس أنا كنت فاكرة إن لو حد زي يونس اختارني… يبقى أنا فعلًا أستاهل.
ابتسم الدكتور بهدوء
ودي أكبر غلطة.
ليه؟
لأن قيمتك مابتتحددش باختيار راجل ليكي
لو يونس اختارك تبقي تستاهلي؟
ولو رفضك تبقي متستاهليش؟
هزت رأسها بسرعة
اكيد لا
يبقى ليه كنتِ عايشة عمرك كله على نفس القاعدة؟
مقدرتش ترد.
فضلت ساكتة شويه
وبعد ثواني همست
أنا كنت غبية.
الدكتور ابتسم
لأ كلنا بنغلط عادي الأهم نتعلم من غلطنا
مسحت دموعها
طب أعمل إيه؟
نبدأ من الأول.
بصي هنلعب لعبه حلوه
لعبة!
هز رأسه وقام وقف وجاب مرايا كبيره وقالها
قومي اقفي قدام المرايا
قامت وقفت بأستغراب فكمل من ورا المرايا
دلوقتي اعتبري المرايا دي نفسك وقولي بتحبي ايه في نفسك
بصت لنفسها بتردد، وبعدها ابتسمت
بحب إني بعرف أضحك الناس.
ابتسم الدكتور
ممتاز وايه كمان
وبحب إني شاطرة في شغلي.
ممتاز.
وبحب إني بحب الناس حتى لو هما ساعات مبيحبونيش.
هز رأسه
وبعدين
ابتسمت للمرة الأولى من قلبها
وبحب إني بعرف أعمل أحلى حلاويات في البلد.
ضحكت وابتسمت بخجل
بحب عيوني
جميل
وبحب ضحكتي
وشعري الطويل
وغمازاتي
وملامحي الطفوليه
هز رأسه بعدها قال
تمام ايه رأيك بقي نعكس السؤال
يعني ايه
يعني اسألي نفسك أنتِ بتكرهي ايه فيكي
سكتت لحظه وهي بتبص لنفسها
بكره جسمي المليان
وايه كمان
بكره اني ضعيفه واني بخاف علي مشاعر الناس بالرغم من أن محدش فيهم خاف علي مشاعري
بعد ما خلصت حست انها مرتاحة تماما خاصه بعد ما اتكلم معاها الدكتور وقالها انها لازم تغير كل اللي بتكرهه في نفسها بالتدريج
خرجت من العيادة وهي حاسة بحاجة غريبة.
مش فرحانة
ومش حزينة.
لكن لأول مرة من سنين…
حاسه إنها عايزة تعرف نفسها بعيد عن كلام الناس. وتغيىر من نفسها علشانها مش علشان حد!
بعد أسبوع…
كان محمود قاعد على السفرة ساكت وسرحان
فوزية بأستغراب
خير يا محمود؟ مالك ساكت كده؟
رفع عينه وقال
انا جالي فرصه شغل كويسة
شهقت بفرحة
بجد
أيوه بس مش هنا
اومال فين
في قرية السواقي.
كيان كانت قاعدة بتاكل، أول ما سمعت اسم القرية رفعت عينيها
السواقي؟
أيوه.
دي بعيدة اوي يابابا
حوالي تلت ساعات من هنا
فوزية بحيره
وهتعمل إيه؟
بصلها هي وكيان وقال
لو قولتلكم نمشي من هنا توافقوا؟
فوزيه ببلاهة
نمشي نروح فين
نروح نعيش هناك!
حطت كيان المعلقة من إيدها وهمست بحيرة
ونسيب هنا
بص لها محمود
اه نسيب هنا
نمشي ونسيب كل اللي فات ورانا
لينا ايه هنا يا كيان
ولا أهل ولا اصحاب ولا حتي شغل كويس!
فوزية بحزن
و الله عندك حق يا محمود
محمود
الشغل اللي جالي ده فلوسه كويسه اوي يا فوزيه مش عايز اضيع الفرصه ديه وفي نفس الوقت مش هقدر اسيبكم لوحدكم هنا
حطت فوزيه ايديها فوق أيده بأبتسامه
خلاص انا موافقه
وانتِ يا كيان؟
ابتسمت كيان ابتسامة هادية
يمكن ده أحسن خبر انا سمعته
محمود بصلها باستغراب
ليه؟
عشان محدش هناك يعرفني.
فوزية فهمت قصدها، فقربت منها وحطت