عروس ابن العمدة بقلم الكاتبه إيمان
العمدة بيلف في القريه من الصبح بيدور علي عروسة لأبنه
ايه ده هوابن العمدة رجع
سألت واحده من الستات بذهول ولهفه
ردت عليها التانية
ايوه رجع من تلت ايام علشان يستلم مكان أبوه في العمودية
ردت الست بحماس
وبيدور علي عروسة!
ردت واحده من الستات بسخرية
ايوه يافوزيه ياحبيبتي عروسه مش جاموسة
فوزيه بأنفعال
قصدك ايه يا ام محمود
قصدي اللي فهمتيه يافوزيه ياختي
ابن العمده جاي يختار عروسه حلوه ومتعلمة وجميله زي بنتي مثلا تليق بمقامه مش يختار جاموسة يفضل يعلف فيها!
انا بنتي جاموسه ياوليه ياللي معندكيش ذوق وحياه امي ما هسيبك
جزت فوزيه فوق أسنانها بعنف وقربت منها وكانت علي وشك تشتبك معاها لكن وقفوا الستات يحاولوا يبعدوهم عن بعض
وفجاه سكت الكل اول ما قربت عربيه العمده من المكان ومعاه ابنه اللي نزل من العربيه يتفحص المكان بعيونه بكل هدوء وثبات
واحدة من الستات قالت وهي بتبصله بهيام
هو ده ابنه؟!
ردت عليها التانية بحماس
أيوه هو
يا لهوي ده قمر
يابختها اللي هتبقي من بخته
ضحكوا الستات، وكل واحدة بدأت تفكر ازاي توقع ابن العمده في شِباك بنتها!
وفي نفس الوقت
على بعد كام بيت، كانت كيان قاعدة على المصطبة قدام بيتهم، ماسكة طبق مليان اكل وحلاويات كالعاده بتاكل وهي بتكلم صاحبتها في الفون..
سمعت بنت بتقول لصاحبتها
تعالي تعالي بيقولوا أن ابن العمده في الشارع اللي جنبنا علي طول
ردت صاحبتها بحماس
بجد يالا بسرعه خليه يشوفني
البنت بسخريه
وانتِ فاكره انه ممكن يلتفت ليكي أو يبصلك حتي
رفعت حاجبها بغيظ
وميبصليش ليه ياحبيبتي ناقصه ايد ولا ناقصه رجل!!
رجعت خصله ورا ودنها بغرور
لا بس مش من مستواه
علي أساس انك من مستواه يا نيره ياحبيبتي
ده انتوا عيله كحيانه بأمانه يعني!
بس متنكريش أن جمالي بيسحر اتخن تخين
ضحكت البنت بسخرية
مغرورة اوي بجمالك
مش يمكن ميسحرش ابن العمده
اصله علي حسب ما سمعت كان عايش في بلد اجنبيه
يعني قدامه الجمال علي اصوله
هزت نيره راسها بتحدي
طب اراهنك أنه هيعجب بيا اول ما يشوفني
هزت أكتافها ببرود
احنا فيها تعالي نروح ونشوف!
يالا بينا
كيان أنتِ يابنتي روحتي فيييين
هه م معلش سرحت شويه كُنا بنقول ايه
بقولك البلد مقلوبه عشان ابن العمده
ردت بلا مبالاه مصطنعه
اه سمعت
ريماس بضيق
معظم بنات البلد كانوا عند امي النهارده في الكوافير
اشمعني
اهو بيتذوقوا لأبن العمده يمكن يعجبوه
ردت بأستغراب
يعجبوه ايه مش يمكن مرتبط؟!
لا العمده بيدورله علي عروسه وعمال يلف بيه في البلدمن الصبح وبيقولوا لحد دلوقتي مفيش ولا واحدة عجبته
كيان بفضول
جه عندكم البيت؟
ريماس
لا يابنتي، كان معدي من هنا من شوية، بس لما سأل عن البيت قالوله مفيش بنات هنا غيري واني مخطوبه
كيان بضحك
امك زمانها مش طايقاكي طبعاً
ريماس
من الصبح عاملة حِداد وحياتك
كيان بسخرية وهي بتاكل
علي ايه يعني!
يا بنتي ده ابن العمدة، مش أي عريس.
هزت كتفها بلا مبالاه
ايه يعني ابن العمده اخر قطعه في الكيمو كونو
ريماس ضحكت
لا مش اخر قطعة ولا حاجه بس عريس لُقطه اي واحده تتمناه
كيان بحزن وهي بتبص علي هدومها وجسمها الغير متناسق
ماعدا انا
ريماس بأستغراب
اشمعني!
مش من حقي اتمني شخص بعينه يا ريماس
ايوه برضو مش فاهماكي ليه أنتِ مش بني آدمه ومن حقك تحلمي وتتمني شخص معين بمواصفات معينه و……
بلاش نضحك علي بعض اللي زي مش من حقها تطلب ولا تتمني
اللي زي اتكتب عليها تقفل علي أحلامها وخيالاتها بضبه ومفتاح لانها استحاله تتحقق!
ريماس بذهول
ليه ياكيان كل ده
مالها اللي زيك ياحبيبتي
هو أنتِ وحشه
ده أنتِ زي القمر والله
ابتسمت ومسحت دمعه شاردة نزلت من عيونها
شكراً علي المجاملة اللطيفة ديه
بس ديه مش مجاملة أنتِ فعلاً جميله بس ناقصك حاجه واحده بس
وايه هي؟
انك تثقي في نفسك اكتر من كده
تعرفي قيمه نفسك
تشوفي نفسك حلوة وجميله وتستاهلي
هزت كيان راسها بقله حيله
بس انا مش جميله
ده مش كلامك
بمعني
يعني ده كلام الناس اللي حواليكي يا كوكي وأنتِ مصدقاه
الناس طول ما هي شيفاكي مستسلمه هتزود كلام
الانسان بأيده يخلي الناس تتكلم عنه كويس وبأيده يخليهم يمرمطوا فيه
اتنهدت كيان وسكتت وهي بتبص لنفسها وبتفكر في كلام ريماس
بعد شويه قفلت معاها ورجعت تكمل اكل بلا مبالاه وهي شايفه البنات رايحين جايين عشان يشوفوا ابن العمده
من فضلك اروح بيت العمدة منين
رفعت عيونها لمصدر الصوت
شافت شاب واقف لابس قميص وبنطلون وكوتشي
خمنت أنه مش من البلد من استايل لبسه
ردت بهدوء ووصفتله البيت
تمشي كده طوالي هتلاقي زريبه قدامك اكسر يمين في شمال هتلاقي ست قاعده علي المصطبه تبص للي رايح واللي جاي هتوقفك هتسألك انت مين واسمك ايه وعندك كام سنه وحالتك الاجتماعيه ايه وشغال ايه وامك اسمها ايه،بعد ما تفلت من الاسئله بتاعتها هتلاقي في وشك شارع تدخل فيه تمشي طوالي هتلاقي بيت العمده قدامك و…..ياكابتتتن انت فاتح بوقك ليه!!!
رمش عيونه اكتر من مره بعدها رجع لرشده
هه ا انا اسف توهت
اصلاً
اصلاً
لوت بوقها وهي بتتنهد بضيق بعدها بدأت تشرحله مره تانيه
تمام شكرا جدا يا انسه؟!
ابتسمت ابتسامه سمجة
العفو يا كابتن
رفع حاجبه بتساؤول
ملكيش اسم ولا ايه؟
رفعت حاجبها هي كمان ببرود
وانت مالك!
رد بذهول
افندم؟!!!!!
مسكت حته جاتوه وحطتها في بوقها بغيظ
بقول لحضرتك وانت ماااااالك
قرب منها وسحب حته من الطبق واخدها في بوقه
انتِ عارفه أنتِ بتتكلمي مع مين؟
بلعت اللي في بوقها وردت بشراسه
هتكون مين يعني انا مبخافش
وبعدين ايه الطفاسه ديه بتاخد من الاكل بتاعي ليه
سحب منها الطبق كله بغيظ وعصبيه
انا حر اعمل اللي انا عايزه
رمشت عيونها اكتر من مره بذهول
انت حر ايه يابني آدم انت هات الطبق
لا
بقولك هات الطبق ياض
ياااض!!!
كانت لسه هترد لكن مامتها دخلت فجأه وهي بتنهج وبتقولها بأستعجال
بت ياكوكي اجهزي بسرعه خلينا نروح للشيخ مُسعد و….
وقفت كلام اول لما شافت الشاب واقف مع كيان
ضربت علي صدرها بشهقه
مين ده يابت وبيعمل ايه هنا
انتِ بتستغلي اني مش موجوده وبتجيبي شباب البيت يابت!
كيان بسخرية
شباب ايه يا ما هي دي اشكال امشي معاها
الشاب بذهول
مالها الاشكال ديه بقي أن شاء الله
تقررررف
قرب منها خطوه
تقرف أنتِ قد كلامك ده؟
وقفت قدامه مباشره وهمست ببطئ
قده وريني هتعمل ايه يا شاطر
هز رأسه بأبتسامه خبيثه
تمام يا شاطرة
لف ومشي خطوتين فصرخت بعنف
الطبق
ابقي قابليني لو لمحتيه تاني
قال جملته الاخيره وطلع يجري طلعت تجري وراه لكنه اختفي في لمح البصر فصرخت بغيظ وهي بتدب في الأرض
عااااااا منك لله كان في حته كنافه هموت عليها ياطفس يابن الطفس!
لفت علشان ترجع شافت امها واقفه وبتبصلها بغضب فبلعت ريقها بتوتر وخوف وهي بتحاول تهديها
اهدي ياما وانا هفهمك كل حاجه والله انا…..
لكنها اتفاجئت لما قالتلها
جهزي نفسك بسرعه خلينا نروح للشيخ مُسعد الدجال
ايه ده يا غاليه!
يابت اخلصي خلي يعملك اي سحر يوقع ابن العمده في شباكك
سحر ايه ياما وكلام فاضي ايه انا….
ضيقت عيونها وهمست بتهديد
انتِ هتيجي معايا بالذوق ولا اروح اقول لأبوكي علي الشاب اللي كان واقف دلوقتي معاكي وهو يتصرف!
ياما وربنا ما اعرفه ده كان تايه
هزت راسها بسخريه
ياحرررام تايه برضو
والله تايه!
والتايه بندله علي الطريق ولا بنديله طبق الحلاويات بتاعنا
ا انا….
ابتسمت ابتسامه صفرا
انتِ هتروحي تجهزي دلوقتي وتيجي معايا ياقلب امك
جزت فوق أسنانها بغيظ
حاااااضر حاااااضر خلي الدجال النصاب ده يضحك عليكي
دخلت تلبس وهي بترطن بكلام مش مفهوم وبعد ما خلصت راحت مع امها للشيخ مُسعد أو بمعني اصح الدجال النصاب اللي بيضحك علي اهالي القريه وبياخد منهم فلوس علشان بعملهم اعمال وسِحر يغير حياتهم للأفضل!!!!؟
بعد شويه
وصلت كيان مع أمها قدام بيت الشيخ مُسعد، والستات رايحة جاية من عنده، وكل واحدة خارجة وهي ماسكة حاجة ومستخبية في هدومها.
كيان بصت للمكان بقرف وقالت
هو ده بيت الدجال النصاب؟
أمها خبطتها في دراعها
وطي صوتك يا بت! يسمعك يعملك عمل يخلي الرجاله تشوفك قرد
ما هو ده اللي ناقص كمان!
اخرسي وادخلي
يااارب صبرني
دخلوا، فلاقوا الشيخ مُسعد قاعد علي الارض، لابس جلابية واسعة، وحاطط قدامه مبخرة وسبحة، وبيتكلم بصوت واطي مع ست قاعدة قدامه
خلاص يا أم فتحي، العمل هيبدأ مفعوله بعد تلات أيام.
الست حطت الفلوس قدامه بسرعة
ربنا يخليك يا شيخنا، بس متأكد أنه هيطلق مراته ويجي يتجوزني؟!
هز رأسه بثقه
عيب عليكي هو انا بتاع مخلل ولا ايه
ردت كيان بتلقائيه وهمس
ياريتك كنت بتاع مخلل احسن ما تبقي خراب بيوت انت والحربايه اللي جنبك!!!
مسكتها امها من دراعها وجزت فوق أسنانها
اخرسي ياللي منك لله
قامت وهي بتبتسم بفرحة
ربنا يكرمك ياشيخ مُسعد
خرجت، وأول ما مُسعد شاف كيان، بص لها من فوق لتحت، وبعدها ابتسم ابتسامة واسعة
اهلاً يا كيان أهلاً ياحجة فوزيه
بلعت فوزيه ريقها بتوجس
ده يعرفنا يابت!
كيان بسخرية
القريه أوضة وصاله وكله يعرف كله عادي متبقيش اوفر ياما
اتفضلوا
قالها مسعد ورمي بخور فأصبحت الاوضه كلها دخان
دخلوا وقعدوا قدامه
بص ناحيه كيان وقال
جلب حبيب مش كده؟؟
ابتسمت كيان ابتسامه صفرا
لا مش كده
مسعد بتفكير
رد مطلقه؟
هزت فوزيه راسها بنفي
لا ياشيخ مُسعد انا عايزاك تعملي عمل يخلي ابن العمده يشوف بنتي أجمل بنت في القريه
الشيخ قرب منها وهمس
سحر المحبة
كيان بأعتراض
يا ماما أنا مش هعمل سحر لحد خلينا نمشي
أمها مسكت إيدها بتوسل
يا بنتي ده ابن العمدة!
يعني؟
يعني لو اتجوزتيه هتعيشي ملكة.
كيان بصت لنفسها وقالت بحزن
هو أصلًا عمره ما هيبصلي
رد مُسعد بهدوء
إلا لو شافك بعين مختلفة.
رفعت عينيها بتساؤول
يعني إيه؟
السحر يخليه يشوفك زي ما إنتِ عايزة.
يعني ممكن يشوفني هيفاء وهبي!!
مسعد
الشخصيه اللي ترسميها في خيالك يقدر يشوفك بيها وينجذبلها
ابتسمت كيان رغماً عنها
طب… هيكلف كام؟
عشرة آلاف.
شهقت بصدمه
عشرة آلاف؟!
فوزيه بذهول
يا شيخنا غالي قوي!
ده ابن العمدة يا فوزية.
بصت لكيان اللي ظهر في عيونها بصيص من الأمل بعدها اتنهدت وهزت رأسها بأستسلام
انا موافقه
وفجأة…
سمعوا صوت شاب من بره
يا شيخ مُسعد؟
الشيخ اتجمد.
كيان بصت لأمها.
أمها بصت للشيخ.
مين ده؟
الشيخ بلع ريقه
معرفش.
الصوت اتكرر
يا شيخ مُسعد، إنت جوه؟
كيان قربت من الباب
افتح يمكن محتاج سحر هو كمان.
شدتها امها بغيظ
اقعدي يا بت!
الشيخ قام ببطء وفتح الباب.
لكن أول ما شاف الشاب، اتغير لون وشه
همسله بكلام مقدروش يسمعوه ودخل
اول لما شافته.
اتسعت عينيها.
انت؟!
الشاب بص لها هو كمان، وبعدين ابتسم بسخرية
ايه الصدف الغريبة ديه
فوزيه بغيظ وعصبيه
انت ليك عين تيجي وراها كمان يابجاحتك
شدت كيان من دراعها وعيونها حمرا
مين ده يابت انطقي
كيان بخوف
والله العظيم ما اعرفه يا ماما والله
الشاب بهدوء
بنت حضرتك بتقول الحقيقه
احنا فعلاً منعرفش بعض
انا مش من البلد
وكنت معدي من قدام البيت ووقفت سألتها علي بيت العمده
والصراحة مقدرتش اقاوم ريحة الحلاويات فسررقت الطبق
قال جملته الاخيره بأحراج بعدها مد ايده بالطبق
انا راقبتكم جيت ارجع الطبق بس وانا في الطريق اتسليت بالأكل وخلص انا اسف!
ابتسمت فوزيه بحنان واخدت منه الطبق
ولا يهمك ياحبيبي الف هنا عجبك؟
جداً
نست فوزيه غضبها واتكلمت بحماس
بنتي احسن واحده بتعمل حلاويات
ومش بس كده ديه كمان عليها شويه اكل مقولكش
ولا البيت يا بشمهندس البيت بيلمع كده من كتر النضافه
والله العظيم كيان بنتي ديه لُقطه اي واحد يتمناها
وجميله ومتعلمه و…..
كيان بعصبيه
في ايه ياماااا هو أنتِ بتشحتي عليا!!
فوزية بصت لها بغيظ
اخرسي يا بت
الشاب كتم ضحكته، وقال
طب جايين هنا ليه ياحجة.
فوزية بتوتر
هه ع عشان
كيان بسرعه
وانت مالك ياجدع انت!
فوزية وهي بتجزفوق أسنانها
يابت بطلي دبش
خلينا نكسب ورقه ربحانه لو ابن العمده مجاش!
رفع حاجبه
ابن العمدة؟
فوزية بحماس
أيوه يا حبيبي، إنت تعرفه؟
الشاب اتوتر لحظة، لكنه أخفى ده بابتسامة بسيطة
آه… سمعت عنه.
فوزية قربت منه
أصل إحنا جايين للشيخ مسعد علشان يعملها عمل يخليه يشوفها أحلى واحدة في الدنيا ويتجوزها.
الشاب بص لكيان بدهشة
عمل؟!
كيان بسرعة
أنا ماليش دعوة! أمي اللي جايباني بالعافية.
الشاب بص لمُسعد
وإنت بتعمل الكلام ده بجد؟
ابتسم مسعد بثقة
اه تحب اعملك عمل جلب حبيب!
مردش عليه وبصلها بفضول
إنتِ عايزة تتجوزي ابن العمدة
علي حسب معلوماتي أنه لسه راجع من سويسرا
يعني محدش يعرفه
عايزه تتجوزي اي حد وخلاص
ولا زيك زي غيرك طمعانه في فلوسه
هزت راسها بنفي
لا
اومال
رفعت عينيها له، وقالت بصدق
أنا نفسي حد يحبني.
سكت المكان.
حتى فوزية نفسها بصت لها للحظة من غير ما تتكلم.
كملت بصوت أوطى لكنه ممزوج برعشة
مش شرط ابن العمدة… ولا غني… ولا حتى مشهور في البلد.
أنا بس نفسي حد يبصلي مرة من غير ما يبص لجسمي الأول.
حد يشوفني أنا مش يهتم بشكلي!
حست بإحراج من نظراته فحاولت تغير الكلام
خلينا نمشي ياما ابن العمده عمره ما هيبصلي لو عملت مليون سحر
فوزية
لا يابت هيبصلك صدقيني أنتِ اجمل واحده في العالم
ابتسمت ابتسامه باهته وقالت بهزار ممزوج بسخرية
القرد في عين امه غزال بقي
على فكرة… لو تسمحتيلي أقول رأيي؟
نفخت بضيق
اتفضل
متعمليش السحر ده
ليه؟
لأن لو حد حبك… المفروض يحبك زي ما إنتِ.
مش عشان حد لعب بعقله وخلاه يشوفك بصورة مش حقيقية
وبعدين السحر ده هيفضل فتره وبعدين هيختفي
بص ناحيه مسعد وقال بسخريه
ده إذا كان سحر حقيقي مش اي كلام!
فوزيه بضيق
الكلام حلو يا بشمهندس
بس الحقيقه والواقع اللي عايشين جواه
بيقول اني الحق بنتي قبل ما تبور وتقعد جنبي
همست كيان بأحراج وعيونها بتلمع بالدموع
ياما كفاية
مسعد اتنحنح بضيق
خلصتوا كلام؟ ولا هنفتح جلسة علاج نفسي هنا؟
ردت فوزيه بهدوء
خلصنا ياشيخ خلينا نعمل السحر
هز الشاب رأسه بقله حيله وخرج بدون ما ينطق حرف زياده
اما عن الدجال بدأ إجراءات النصب
بعد مرور ساعه
دخل من البوابة، لقى العمدة واقف في الحوش بيتكلم مع واحد من رجال البلد.
أول ما شافه، ابتسم
اتأخرت ليه يا ابني؟
هز أكتافه بهدوء
كنت بلف شوية في البلد.
حط أيده فوق كتفه وسأله
ورأيك ايه في بنات البلد يا يونس
قعد يونس على الكرسي ومط شفايفه ببرود
عاديين
العمدة بذهول
ازاي يعني
كلهم كانوا عارفين إني جاي.
العمدة
يعني؟
ابتسم بسخرية
يعني كل واحدة كانت لابسة أحسن حاجة عندها وقاعدة مستنياني
العمدة ضحك
وإنت كنت عايزهم يعملوا إيه؟
كنت عايز أشوف البنت على طبيعتها
سكت لحظة، وبعدين قال
عايز واحدة لما تعرف أنا مين، متغيرش حاجه في شكلها ولا تغير طريقتها
بس البلد كلها كانت عارفه انك جاي واني بدورلك علي عروسه
طبيعي البنات
