مراتي التانيه

فاتن مراتى التانيه بعد الحمل أمها تعبت والدكاتره قالوا انها ماتتحركش من السر,,ـــــير ومحتاجة حد يساعدها وانا فلوسى كلها بتروح على مراتى الحامل غزل تحاليل وفيتامينات ولبس المولود وبحهز للولاده ولو قولتلها مالناش دعوه بمامتك الزعل هيأثر على البيبى وقتها فكرت اخد حماتى واوديها لمراتى الأولى تراعيها لحد ما غزل تخف وتقوم بالسلامه وتقدر توقف على رجلها وفى نفس الوقت حماتى تكون بقت حالتها افضل وتقدر تساعد بنتها بعد كده وفعلاً روحت لفاتن … وقولتلها بصراحة من غير ما ألف وأدور: “يا فاتن، إنتي كبيرة العيلة وست عاقلة وأنا ماليش غيرك يقف جنبى في الشدة دي. أم غزل مريضة جداً والدكاترة منعوها من الحركة، وغزل زي ما إنتي شايفه تعبانة في حملها ومحتاجة اللي يشيل عنها، وأنا مصاريفي كلها رايحه بسبب تجهيزات الولادة والتحاليل. أنا عاوز أجيب حماتي تقعد هنا عندك كام شهر، تراعيها وتاخدي بالك منها لحد ما الأمور تتظبط وغزل تقوم بالسلامة. ” فاتن سكتت لحظة، ونظراتها ليا كانت مخلوطة بذهول وغضب، وبعدين بصتلي وقالت بصوت هادي : “يعني إنت يا سي السيد، عاوزني أخدم حماتك اللي هي أم ضرتي؟ إنت جاي تطلب مني أشيل شيلة غيري عشان إنت تريح نفسك وتوفر قرشين لمراتك التانية؟ إنت فاكرني إيه بالضبط؟ ” حاولت أهديها وقولتلها: “يا فاتن افهميني، الموضوع إنساني خالص، وإنتي طول عمرك صيلة وبنت أصول، والزعل هناك ممكن يؤذي البيبي ويهدد حمل غزل، إنتي ترضي البيبي يجراله حاجة؟” ضحكت ضحكة مكسورة وقالتلي: “ودلوقتي افتكرت الأصول والإنسانية؟ لما روحت اتجوزت وفضلت غيري عليا ما فكرتش في مشاعري ولا زعلي! ودلوقتي جاي تحملني هم فوق هومي وعاوزني أكون الخدامة اللي بتراعي عيلة مراتك التانية عشان سيادتك خايف على مشاعرها؟ لو إنت راجل صاحب بيت، شيل مسؤوليتك بنفسك، يا تجيبلها حد يخدمها بفلوسك، يا تنزل إنت تخدمها، إنما أنا خط أحمر… أم ضرتك مش هتعتب باب البيت ده! ” وقفت مكاني مش عارف أرد، الكلام نزل عليا زي المية الساقعة، وحسيت إن كل الطرق اتقفلت في وشي، ـ بصى يا فاتن انا مضطر اجيبها هنا لان مافيش مكان تانى اوديها ليه ومش معايا فلوس اجيبلها حد وبعدين غزل من اول الحمل وهى قعدت من الشغل فطبيعى اعوضها عن المرتب اللى قطع عنها لقيت فاتن بصتلى بصهو اول مره اشوفها ومكنتش عارف افسرها وقالت ـ انت عارف انا مكمله وساكته ليه ؟ ؟ عشان ولادك مايحسوش بنقص قدام زمايلهم فى المدرسه ومستحمله إنك بطلت تصرف عليهم وقولت انا بعوضهم ومش حرماهم من حاجه يمكن فى يوم تحس بيهم لكن انت للأسف فاقد كل حاجه ـ لأ طبعا مجرد ما غول تولد مش هخليهم ناقصين حاجه ارتسمت على غزل ضحكه سخريه وقالتلى وهى رافعه حاجبها ـ ياترى بقى لما تجيب حماتك هنا انت هتعرف تصرف عليها وعلى ادويتها وقتها سكت لأنى مكنتش عايز اكدب عليها بس قررت انى اعدى الموقف لحد ما توافق ـ أه طبعاً هبعتلك فلوسها ـ يعنى معاك تصرف على مراتك ومصاريف ولاده ولبس أطفال وعلل حماتك وادويتها وولادى لأ وقتها سكت ومابقتش عارف اقول ايه واتصدمت أكتر لما لقيتها وافقت، لأنها بعد ما كانت رافضة تمامًا، بصتلي وقالت بهدوء: ـ خلاص يا محمود، هاتها تقعد عندي. بصيتلها باستغراب وقلتلها: ـ بجد يا فاتن؟ يعني إنتي موافقة؟ ـ أيوه يا محمود، موافقة، بس عاوزاك تعرف إن موافقتي دي مش عشانك، ولا عشان خايفة على حمل غزل، أنا وافقت عشان الست مريضة وملهاش ذنب في اللي بيحصل، ومش هرضى إنها تتبهدل وهي في الحالة دي. حسيت براحة كبيرة، وقومت من مكاني وأنا بقولها: ـ ربنا يخليكي ليا يا فاتن، والله ما هنسى وقفتك دي طول عمري. بصتلي بمرارة وقالت: ـ ماتنساش يا محمود، بس المرة دي ماتنساش بجد، مش زي ما نسيت إن ليك بيت وولاد هنا. الكلمتين ضايقوني، لكن عملت نفسي مش سامع، وخرجت من عندها وأنا بفكر في الطريقة اللي هجيب بيها حماتي من غير ما أتعب غزل، خصوصًا إن حالتها كانت محتاجة حد يساعدها في كل حاجة تقريبًا. وبعد يومين، جبت أم غزل من المستشفى، ووصلتها لبيت فاتن، وكنت فاكر إن أصعب جزء في الموضوع انتهى، وإن فاتن هتقوم بالواجب لحد ما غزل تولد وتتعافى. أول ما دخلنا البيت، فاتن كانت مجهزة أوضة كاملة لحماتي، وحاطة جنب السر,,ـــــير كل اللي ممكن تحتاجه، وحتى الأدوية رتبتها في علبة صغيرة، وكتبت مواعيدها على ورقة علشان ماتتلخبطش. بصيتلها بإعجاب وقلتلها: ـ إنتي تعبتي نفسك ليه بس؟ كنتي استني لما نوصل ونشوف هنرتب الدنيا إزاي. ردت من غير ما تبصلي: ـ الست تعبانة، ومش ناقصة تستنى لحد ما حضرتك تقرر تعمل إيه. سكت، وقلت في نفسي إنها لسه زعلانة مني، لكن مع الوقت هتهدى، خصوصًا إنها وافقت تستقبل حماتي، وده لوحده كان كفاية بالنسبالي. قبل ما أمشي، دخلت أطمن على حماتي، ولقيت فاتن قاعدة جنبها بتساعدها تشرب الدوا، وبتسألها لو محتاجة حاجة. حماتي مسكت إيدها وقالتلها: ـ ربنا يكرمك يا بنتي، أنا عارفة إني تقيلة عليكي، ومش عارفة أشكرك إزاي على اللي بتعمليه معايا. فاتن ابتسمت وقالتلها: ـ ماتقوليش كده يا خالتي، إنتي في بيتك، وربنا يقومك بالسلامة. خرجت من الأوضة وأنا مطمن، واتصلت بغزل أطمنها على أمها، ولما حكيتلها إن فاتن استقبلتها كويس، فضلت تدعي لها وتشكر فيها، وأنا حسيت إني عملت الصح، وإن ربنا عوضني بواحدة جدعة زي فاتن، حتى لو علاقتنا مبقتش زي الأول. لكن اللي ماكنتش أعرفه إن فاتن كانت بتجهز لحاجة تانية خالص. عدى أول أسبوع، وفاتن كانت بتعمل كل حاجة بنفسها، تصحى الصبح تجهز الفطار للولاد، وتطمن على أم ghazal، وتديها دواها، وتساعدها في الأكل وتغيير هدومها، وبعدها ترجع تتابع مذاكرة الولاد واحتياجات البيت. وكل ده وأنا ولا كأني موجود! كنت باتصل بيها أسألها عن حماتي، فترد عليا بكلمتين، ولو سألتها محتاجة فلوس لأي حاجة، تقولي: ـ ماتشغلش بالك، أنا مدبرة أموري. والحقيقة إني كنت مبسوط من ردها، لأني فهمت منه إنها مش محتاجة مني حاجة، وده وفر عليا مصاريف إضافية كنت مش عارف هجيبها منين. لحد ما جه اليوم اللي غزل اتصلت بيا فيه وقالتلي: ـ محمود، أنا تعبانة أوي النهارده، ومحتاجة أمي جنبي، ينفع تيجي تاخدها شوية تقعد معايا؟ اتوترت وقلتلها: ـ يا غزل، إنتي عارفة إن أمك لسه مش بتقدر تتحرك لوحدها، وبعدين فاتن تعبت معاها وجهزتلها كل حاجة، إزاي هاخدها دلوقتي؟ غزل اتضايقت وقالتلي: ـ يعني إيه يا محمود؟ دي أمي، وأنا حامل ومحتاجة وجودها جنبي، مش هطلب منك حاجة مستحيلة. ـ يا حبيبتي أنا مقدر ده، بس اصبري شوية لحد ما حالتها تتحسن. قفلت مع غزل، واتصلت بفاتن أحاول أشوف معاها حل، لكنها ماردتش، ولما رحت البيت في آخر اليوم، لقيت الأولاد قاعدين في الصالة، والبيت هادي بشكل غريب. ناديت: ـ يا فاتن! إنتي فين؟ محدش رد. دخلت أوضة حماتي، لقيتها نايمة، وعلى الكومود ورقة مكتوب فيها مواعيد الدوا، وتحتها ورقة تانية فيها شوية تعليمات عن الأكل والرعاية. استغربت، وخرجت أدور على فاتن، لكن ملقتهاش في المطبخ ولا أوضتها، ولما دخلت أوضة النوم، اتصدمت لما لقيت دولابها فاضي تقريبًا، وشنطتها مش موجودة. جريت على أوضة الولاد، لقيت هدومهم متجمعة في شنط، وكل واحد فيهم قاعد ساكت، ولما سألت ابني الكبير: ـ إيه اللي بيحصل هنا؟ مامتك فين؟ بصلي بحزن وقال: ـ ماما مشيت يا بابا. حسيت إن قلبي وقع في رجلي، وسألته بعصبية: ـ مشيت راحت فين؟ وإزاي تسيب البيت من غير ما تقولي؟ ابني مد إيده وناولني جواب كان محطوط على السر,,ـــــير، وقال: ـ قالتلي أديهولك أول ما تيجي. فتحت الجواب وإيدي بتترعش، ولقيت خط فاتن اللي أعرفه كويس، لكن الكلام اللي مكتوب جواه كان كأنه طالع من واحدة تانية، واحدة استحملت كتير لحد ما خلاص مبقاش عندها حاجة تستحملها عشاني. “محمود، أنا مشيت، ومش عايزاك تدور عليا، ولا تحاول ترجعني بكلمتين حلوين زي كل مرة. أنا وافقت أستقبل أم غزل، وكنت عارفة إن ده مش واجبي، لكن قولت أعمل اللي يرضي ربنا، وأساعد ست مريضة مالهاش ذنب في مشاكلنا. عملت لها كل اللي أقدر عليه، واعتبرتها زي أمي، ومش ندمانة على ده، لكن اكتشفت إن المشكلة عمرها ما كانت في أم غزل، المشكلة فيك إنت. إنت مش شايف غير غزل واحتياجاتها، ومش شايف إن ليك بيت تاني، وولاد مستنيين منك تسأل عليهم، ومرات عاشت سنين بتحاول تعوضهم عن غيابك، لحد ما نسيت إنها هي كمان من حقها تلاقي حد يسأل عليها ويشيل عنها. إنت كل مرة بتحطني قدام الأمر الواقع، وتستنى مني أوافق، لأنك متأكد إني عمري ما هخذل ولادك، وكنت بتستغل حبي ليهم علشان تريح نفسك من مسؤولياتك. علشان كده، أنا جمعتلك كل حاجة هتحتاجها علشان تعرف تخدم أم غزل بنفسك. مواعيد دواها مكتوبة جنب سر,,ـــــيرها، وطريقة أكلها وكل احتياجاتها هتلاقيها في الورقة اللي جنب الأدوية، وهدومها نضيفة ومحطوطة في الدولاب، وكل حاجة تخصها جاهزة. وفوقيهم ولادك يا محمود. دول محتاجين حد يصحّيهم للمدرسة، ويجهزلهم الفطار، ويتابع مذاكرتهم، ويسألهم يومهم كان عامل إزاي، ويحــ,,ـــــضنهم لما يزعلوا. دول مش محتاجين فلوس وبس، دول محتاجين أب، وأنا مش هقدر أفضل أعوضهم عنك طول العمر. أنا مشيت علشان تعبت من إني أكون الزوجة اللي بتشيل كل حاجة، وتتنازل عن كل حاجة، وفي الآخر محدش بيفتكر إنها بني آدمة وليها طاقة وليها قلب. من النهارده، شيل مسؤوليتك بنفسك، واعرف إن الست اللي كنت ضامن إنها هتفضل مستحملاك مهما عملت، وصلت لمرحلة إنها اختارت نفسها. فاتن.” خلصت قراءة الجواب، وفضلت واقف مكاني مش قادر أستوعب. بصيت حواليا، على البيت اللي كان دايمًا مرتب، وعلى شنط الولاد، وعلى أوضة حماتي اللي محتاجة رعاية، وحسيت لأول مرة إن كل حاجة كنت برميها على فاتن رجعت فوق دماغي مرة واحدة. وفجأة، ابني الصغير قرب مني وشدني من هدومي وقال بصوت مكسور: ـ بابا, هو ماما مش هترجع تاني؟ أصل أنا وعدتها إني مش هعيط، بس أنا عايزها. بصيتله، وحاولت أتكلم، لكن لساني اتعقد. وفي اللحظة دي، رن موبايلي. كانت غزل. رديت عليها بصوت مخنوق، فقالتلي: ـ محمود، إنت فين؟ أنا محتاجة ماما، ومش عارفة أوصل لها، تليفونها مقفول! ايه رايك اجى اقعد معاكم بصيت للجواب اللي في إيدي، وبعدين بصيت لابني اللي واقف مستني مني إجابة، وأدركت إن فاتن ما سابتليش أم غزل وبس، دي سابتلي كل المسؤوليات اللي كنت بهرب منها، وخلتني لأول مرة أواجه نتيجة اختياراتي بنفسي. ولأول مرة من سنين، ماكنتش عارف أروح لمين، ولا أطلب من مين ينقذني من الورطة اللي أنا حطيت نفسي فيها. لأن فاتن، المرة دي، ما سابتش البيت علشان تعاقبني… سابته علشان خلاص مبقاش عندها استعداد تضحي بنفسها عشاني. “هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.” فاتن ٢ فضلت واقف في نص الصالة، ماسك جواب فاتن في إيدي، ومش عارف أتصرف إزاي، والولاد حواليا كل واحد فيهم بيسألني عن أمه، وأنا مش لاقي إجابة واحدة أقدر أقولها تطمنهم. رديت على غزل اللي كانت لسه بتتكلم في التليفون، وقلتلها بضيق: ـ اسمعيني يا غزل، أنا عندي مصيبة هنا ومش ناقص خالص، فاتن مشيت وسابت البيت. غزل سكتت لحظة، وبعدها قالت باستغراب: ـ مشيت راحت فين؟ وإزاي يعني مشيت؟ طب وأمي؟ سابت أمي لمين؟ ـ سابت أمك ليا يا غزل، وسابتلي الولاد كمان،وأنا مش عارف أعمل إيه، لا عارف أتصرف مع أمك ولا عارف أسيب الولاد لوحدهم. غزل اتنهدت وقالت: ـ طب ما تهدى كده، أكيد فاتن زعلانة من حاجة، حاول تكلمها وتفهم منها، وأنا هاجي عندك بكرة ونشوف الموضوع ده. أول ما سمعت إنها هتيجي، حسيت إن فيه حمل اتشال من على قلبي، وقلتلها بسرعة: ـ أيوه يا غزل، تعالي، أنا محتاجك جنبي فعلًا، ومحتاج حد يساعدني في البيت، أنا مش هقدر أعمل كل ده لوحدي. غزل فهمت كلامي بطريقتها، وافتكرت إني عايزها تيجي علشان فاتن مشيت، وإنها هتلاقي أمها في البيت، وإنها هتقدر تقعد معاها وتخليها تحت عينها، خصوصًا إنها كانت لسه تعبانة من الحمل ومحتاجة الراحة. قفلت معايا وهي بتفكر إنها أخيرًا هتبقى قريبة من أمها، وإن وجودها عندي هيحل مشاكل كتير. أما أنا، ففضلت طول الليل أحاول أتصرف. صحيت الولاد، وجهزتلهم أكل على قد ما قدرت، وبعدها دخلت أطمن على حماتي، وساعدتها تاخد دواها، لكن كنت مرتبك ومش عارف أعمل إيه بعدها. كل شوية واحد من الولاد يطلب مني حاجة، والتاني يسألني عن أمه، وأنا أعصابي كانت بتفلت مني. ـ يا بابا، أنا مش لاقي الكراسة بتاعتي! ـ يا بابا، هو ماما هترجع إمتى؟ ـ يا بابا، أنا جعان! وفي الآخر صرخت فيهم: ـ خلاص بقى! كل واحد يقعد مكانه، هو أنا هتجنن منكم؟! سكتوا كلهم، وبصوا لبعض، وبعدها ابني الكبير أخد أخوه ودخلوا أوضتهم من غير ما ينطقوا بكلمة. وقتها حسيت بوخزة في قلبي، لكن كنت تعبان ومش قادر أفكر في أي حاجة غير إني أعدي اليوم بأي طريقة. تاني يوم، غزل وصلت البيت، وأول ما دخلت سألتني: ـ أمي فين؟ عايزة أشوفها. شورتلها على الأوضة، فدخلت بسرعة، ولما شافت أمها جريت عليها وحــ,,ـــــضنتها، وفضلت تسألها عن صحتها وعن اللي حصل معاها. بعد شوية خرجت غزل من الأوضة، ووشها كان متغير من العياط، وقالتلي: ـ محمود، إنت إزاي سايب أمي هنا لوحدها؟ مين بيساعدها؟ ومين بيديها دواها؟ بصيتلها باستنكار وقلتلها: ـ إنتي بتسأليني أنا؟ ما إنتي جاية علشان تساعديني! غزل رفعت عينيها ليا وقالت: ـ أساعدك في إيه؟ أنا حامل وتعبانة، وإنت بنفسك اللي كنت بتقولي إنك هتتصرف وإن فاتن هتراعي أمي! ـ أيوه، بس فاتن مشيت، وأنا مش هقدر أعمل كل حاجة لوحدي، عندي ولاد محتاجين رعاية، وعندي أمك اللي مش بتقدر تتحرك، والبيت محتاج يتعمل فيه أكل وتنضيف، وإنتي أهو جيتي، يبقى لازم تساعديني. غزل فضلت باصة ليّ ثواني، كأنها بتحاول تستوعب الكلام اللي سمعته، وبعدها ضحكت ضحكة عصبية وقالت: ـ إنت جايبني هنا علشان أخدم أمك وأخدم ولادك؟ ! ـ أمك يا غزل، مش أمي! وبعدين دول ولادي، وأنا مش بقولك تخدميهم، أنا بقولك تساعديني لحد ما نشوف حل. غزل اتعصبت وقالت: ـ تساعدك إزاي يا محمود؟ أنا كنت فاكرة إني جاية علشان أطمن على أمي وأقعد جنبها، مش علشان أشيل مسؤولية بيتك كله! إنت عارف إني مش قادرة أقف على رجلي من التعب، وبدل ما تراعيني وتخفف عني، جاي تحطني مكان فاتن؟! حاولت أهدّيها وقلتلها: ـ يا غزل، أنا مش طالب منك حاجة مستحيلة، كل اللي عايزه إنك تساعديني شوية، لحد ما الدنيا تتظبط. ردت عليا بغضب: ـ والدنيا هتتظبط إزاي؟ لما أمك تتعب هتطلب مني أخدمها؟ ولما ولادك يحتاجوا حاجة هتقوللي أعملها؟ ولما البيت يتبهدل هتستنى مني أنضفه؟ طب وأنا يا محمود؟ أنا فين من كل ده؟! ـ يا بنتي ما تكبريش الموضوع، إنتي مراتي، والمفروض نقف جنب بعض في الشدة. غزل بصتلي بصدمة وقالت: ـ مراتي؟! أمال فاتن كانت إيه؟ مش مراتك برضه؟ ولما كانت بتشيل عنك كل حاجة، كنت بتقف جنبها إزاي؟ كنت بتصرف على ولادك؟ كنت بتسألهم محتاجين إيه؟ ولا كنت سايبها هي تشيل كل حاجة، ولما تعبت من الحمل اللي إنت حطيته فوق دماغها، قررت تمشي؟ ! اتنرفزت من كلامها وقلتلها: ـ إنتي مالك بفاتن دلوقتي؟ إحنا بنتكلم عن اللي بيحصل هنا! ـ لأ يا محمود، أنا مالي جدًا، لأنك جايبني هنا علشان أعمل نفس اللي كانت بتعمله، ولما رفضت، بقيت أنا المقصرة ـ يعني إيه رفضتِ؟ إنتي لسه داخلة البيت، وأنا حتى ما طلبتش منك تعملي حاجة! غزل أشارت ناحية المطبخ وقالت: ـ طب والأكل اللي على النــ,,ـــــار ده مين هيعمله؟ والهدوم اللي متكومة دي مين هيغسلها؟ وأمك اللي محتاجة حد يساعدها في كل حاجة مين هيقوم بيها؟ والعيال اللي محتاجين حد يتابعهم مين هيراعيهم؟ إنت مستنيني أعمل كل ده وأنا في شهور الحمل الأخيرة؟! كنت واقف قدامها ومش لاقي رد، لكنها ما سابتنيش أتكلم، وكملت وهي بتلم حاجتها: ـ أنا غلطانة إني صدقتك لما قلتلي إنك هتتصرف، وغلطانة إني افتكرت إنك هتكون سند ليا ولأمي، لكن واضح إنك مش عايز زوجة تشاركك حياتك، إنت عايز واحدة تشيل عنك مسؤولياتك، وأول ما ترفض، تحسسها إنها أنانية! قربت منها وقلتلها: ـ رايحة فين يا غزل؟ ـ هاخد أمي وأمشي. اتصدمت وقلتلها: ـ تمشي تروحي فين؟ إنتي لسه تعبانة، وأمك مش هتقدر تتحرك من غير رعاية! ـ هتصرف، زي ما إنت بتقوللي أتصرف دلوقتي. أمي مسؤوليتي، وأنا مش هسيبها، لكن مش هقدر أشيل مسؤولية بيتك وولادك فوق مسؤوليتي. ـ يعني هتسيبيني أنا كمان؟! بصتلي غزل بمرارة وقالت: ـ إنت اللي سبت نفسك يا محمود، من يوم ما قررت إن كل واحد في حياتك لازم يشيل عنك، وإنت واقف تتفرج! دخلت أوضة أمها، وساعدتها تجهز نفسها على قد ما قدرت، وبعدها طلبت عربية، وبمساعدة السواق قدرت تنقل أمها وتاخد حاجتها الضرورية. فضلت واقف عند الباب، بتابعها وهي خارجة، ومش مصدق إن كل حاجة بتنهار في يومين. ناديت عليها: ـ يا غزل، استني! طب استني نتكلم! لكنها ما بصتليش حتى، وخرجت وقفلت الباب وراها. وقتها حسيت إن البيت بقى أوسع من اللازم، وأهدى من اللازم، وأتقل من إني أقدر أعيش فيه. بصيت على أوضة الولاد، ولقيتهم واقفين عند الباب، بيتابعوا اللي حصل، وابني الكبير سألني: ـ هي غزل مشيت ليه يا بابا؟ ماكنتش عارف أقول إيه، فدخلت أوضتي وقفلت الباب، وفضلت قاعد على السر,,ـــــير، حاطط إيدي على راسي. كان نفسي أتصل بفاتن وأقولها ترجع، وأوعدها إني هتغير، لكن كنت عارف إنها المرة دي مش هتصدقني بسهولة. وكان نفسي أتصل بغزل وأرجعها، لكن هي كمان مشيت، ومش عارف حتى راحت فين. وفي وسط كل ده، سمعت صوت ابني الصغير بيعيط بره، وبيقول لأخوه: ـ أنا عايز ماما فاتن، أنا عايزها تيجي تنام جنبي زي كل يوم. حسيت إن قلبي بيتقطع، لكن ما خرجتش لهم. فضلت مكاني، أتجاهل رنات تليفوني، وأتجاهل رسائل غزل، وأتجاهل حتى عياط الولاد، مش علشان مش فارقين معايا، لكن علشان كنت عاجز أواجههم، وعاجز أعترف لنفسي إني وصلت للمرحلة دي بإيدي. عدى اليوم، وبعده يوم تاني، وأنا لا عارف أشد حالي وأروح أدور على فاتن، ولا عارف أروح لغزل وأطلب منها ترجع. كل واحدة فيهم كانت مستنية مني موقف، وأنا لأول مرة أكتشف إن السكوت مش هيحل حاجة، وإن الهروب اللي كنت فاكره أسهل حل، بقى هو السبب في كل اللي أنا فيه. وبالليل، لما دخلت أطمن على الولاد، لقيت ابني الكبير نايم جنب أخوه، وحاضنه، وعلى المخدة جنبهم صورة صغيرة فاتن. مسكت الصورة، وفضلت أبص فيها، وافتكرت كل مرة كانت بتطلب مني أقعد مع الولاد شوية، وكل مرة كنت أتحجج بالشغل أو بمصاريف غزل، وأقول لنفسي إنهم لسه صغيرين ومش هيفهموا. لكنهم فهموا يا محمود… فهموا إن أبوهم موجود في البيت بجسمه، لكن قلبه ومسؤوليته في مكان تاني. وساعتها بس، بدأت أفهم إن المشكلة ماكنتش في فاتن اللي مشيت، ولا في غزل اللي رفضت تفضل، ولا حتى في أم غزل اللي محتاجة رعاية. المشكلة كانت فيّ أنا، وفي إني كنت عايز أرضي الكل من غير ما أتحمل مسؤولية حد، لحد ما خسرت راحة البيت، وبدأت أخسر الناس اللي كنت فاكر إنهم عمرهم ما هيمشوا. “هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.” عدى أسبوع كامل وأنا عايش في جحيم، البيت اللي كنت فاكره هيستحمل غياب فاتن كام يوم، اكتشفت إنه من غيرها مابقاش بيت أصلًا. الولاد بقوا طول الوقت ساكتين، وكل واحد فيهم بيحاول يتصرف على قد سنه، وأنا بقيت بصحى الصبح مش عارف أبدأ منين ولا أخلص إيه. كنت باخدهم المدرسة بالعافية، وأرجع أجهز أكل، وأدخل أطمن على أم غزل اللي كانت لسه محتاجة رعاية، ولما كنت بتصل بغزل علشان أطلب منها ترجع أو حتى تبعت حد يساعدني، كانت بترفض ترد عليا، ولو ردت تقولي إنها مش هترجع البيت ده تاني. وفي يوم، كنت قاعد في الصالة والولاد لسه راجعين من المدرسة، سمعت خبط على الباب. قمت أفتح، وأول ما شفت فاتن واقفة قدامي، حسيت إن روحي رجعتلي. كانت لابسة عبايتها، وفي إيدها شنطة صغيرة، ووشها هادي بشكل خلاني أفتكر إنها أخيرًا هديت وراجعة بيتها. قولتلها بلهفة: ـ فاتن! أخيرًا رجعتي! إنتي مش متخيلة البيت عامل إزاي من غيرك، والولاد كل يوم بيسألوا عليكي، وأنا...قاطعتني بهدوء: ـ أنا مش جاية أرجع يا محمود. الكلمة نزلت عليا زي الصاعقة، وبصيتلها مش مستوعب. ـ أمال جاية ليه؟ دخلت، وحطت الشنطة على الترابيزة، وبصتلي وقالت: ـ جاية أطلب الطلاق. فضلت باصلها ثواني، وبعدها ضحكت ضحكة عصبية وقلتلها: ـ طلاق إيه يا فاتن؟ إنتي اتجننتي؟ يعني عشان زعلتي مني تسيبي بيتك وولادك وتطلبي الطلاق؟ طب والعيال ذنبهم إيه؟ بصتلي بوجع وقالت: ـ ماتجيبش سيرة العيال علشان تضغط عليا يا محمود، أنا عمري ما قصرت معاهم، وحتى وأنا ماشية، كنت حريصة أسيبهم في أمان، لكن إنت اللي خليتهم يدفعوا تمن قراراتك. ـ طب ما ترجعي ونحل كل حاجة، وأنا أوعدك إني هتغير، وهصرف على الولاد، وههتم بيهم، ومش هخليكي محتاجة حاجة تاني. هزت راسها وقالت: ـ الكلام ده سمعته منك كتير، وكل مرة كنت بصدقك وأديك فرصة جديدة، لحد ما بقيت بتعتبر تنازلاتي حق مكتسب ليك. قربت منها وحاولت أمسك إيدها، لكنها بعدت عني وقالت: ـ أنا مش جاية أتناقش في اللي فات، أنا جاية أقولك إني خلاص خدت قراري، وعايزة أنهي الجوازة دي باحترام، وكل واحد فينا ياخد حقه. اتعصبت وقلتلها: ـ وحقوق إيه اللي بتتكلمي عنها؟ إنتي عايزة تطلقي وتاخدي حقوقك كمان؟ بعد كل السنين دي؟بصتلي بثبات وقالت: ـ أيوه يا محمود، عايزة كل حقوقي، ومش هاخد أقل من حقي علشان خاطر العشرة، لأنك إنت اللي ضيعت العشرة دي بإيدك. وبعدين طلعت ورقة من شنطتها وحطتها قدامي. ـ دي قائمة منقولاتي، ودي الأوراق اللي تخص حقوقي، وأنا كلمت محامي، وكل حاجة هتم بالطريقة القانونية. أنا مش جاية آخد حاجة مش من حقي، لكن مش هتنازل عن حاجة من حقي علشان إنت اتعودت إني أسكت. مسكت الورق وأنا حاسس إن الدنيا بتضيق حواليا، وقلتلها: ـ يعني إنتي مجهزة كل ده من ورايا؟ إنتي كنتي بتخططي للطلاق من يوم ما مشيتي؟ردت من غير تردد: ـ لأ، أنا يوم ما مشيت كنت محتاجة أبعد علشان أفكر، لكن كل يوم عدى بعيد عنك أكدلي إني كنت عايشة مع راجل مش شايفني، ومش مقدر وجودي، وبيفتكرني بس لما يحتاج مني حاجة. ـ طب والولاد؟اتغيرت ملامحها، ودموعها لمعت في عينيها، لكنها تماسكت وقالت: ـ ولادي هيفضلوا ولادي، وعمري ما هتخلى عنهم، وهشوفهم وأراعيهم، لكن مش هرجع أعيش معاك علشان أربيهم وأربيك معاهم. في اللحظة دي، الولاد خرجوا من أوضتهم، وأول ما شافوا أمهم، جريوا عليها. ابني الصغير حضنها وهو بيعيط: ـ ماما، إنتي هتمشي تاني؟ أنا عايز أروح معاكي!فاتن نزلت لمستواه، وحضنته بقوة، ودموعها نزلت وهي بتقوله: ـ يا حبيبي، إنتوا ولادي، وعمري ما هبعد عنكم، بس أنا وبابا لازم كل واحد فينا يعيش في مكان لوحده. ابني الكبير بصلي وقال: ـ يعني إنتوا هتتطلقوا يا بابا؟ماعرفتش أرد، وفاتن مسحت دموعها وقالتله: ـ دي مشاكل بين الكبار يا حبيبي، وإنتوا مالكوش ذنب فيها، ومحدش فينا هيبطل يحبكم. وقتها حسيت إن كل كلمة بتقولها بتكشف قد إيه أنا قصرت في حقهم، وإن حتى في لحظة فراقها، هي لسه بتحاول تحميهم من اللي أنا سببته. حاولت أتكلم معاها مرة أخيرة: ـ فاتن، أنا مش هقدر أعيش من غيرك، والله ندمت، وأنا مستعد أعمل أي حاجة علشان ترجعي. بصتلي وقالت: ـ لو كنت ندمت بجد، كنت فكرت فيا قبل ما توصلني للمرحلة دي، لكن إنت ماحسيتش بغيابي غير لما لقيت نفسك مضطر تعمل كل حاجة بنفسك. سكت، لأنها كانت عندها حق. وبعد ما طمنت الولاد إنها هتشوفهم قريب، قامت وخدت شنطتها، واتجهت ناحية الباب. جريت وراها وقلتلها: ـ طب رايحة فين دلوقتي؟بصتلي للمرة الأخيرة وقالت: ـ راجعة بيتي يا محمود. استغربت وقلتلها: ـ بيتك فين؟ ده بيتك أهو! ردت بهدوء: ـ لأ، ده البيت اللي كنت عايشة فيه معاك، إنما بيتي هو المكان اللي أحس فيه بالأمان والاحترام، والمكان اللي محدش يعتبر وجودي فيه خدمة مجانية بيقدمها له. أنا هعيش في مكان يخصني، وإنت هتفضل في البيت ده لحد ما ننهي الإجراءات، وبعدها هتتصرف في سكنك بنفسك. وقتها فهمت إنها مش بتهددني، وإنها فعلًا مش راجعة. وبعد أسابيع، تم الطلاق، وفاتن أخدت حقوقها كاملة، ورجعت البيت تانى أما أنا، فلقيت نفسي مضطر أسيب البيت اللي كنت عايش فيه، لأن ملكيته كانت تخص فاتن، وماكانش عندي حق أفضل فيه بعد ما انتهت علاقتنا، رجعت تانى قعدت مع غزل وامها غزل فضلت بعيدة عني، وبعد ما ولدت، قررت إن علاقتنا مش هتستمر بالشكل اللي كنا عايشين بيه، خصوصًا بعد ما اكتشفت إني مش قادر أكون الزوج اللي هي محتاجاه، ولا أنا قادر أديها الحياة اللي وعدتها بيها. خصوصاً أن نص مرتبى رايح نفقه للولاد وفي النهاية، بقيت لوحدي ، بحاول أتعلم أعمل كل حاجة فاتن كانت بتعملها، وأحاول أعوضهم عن غيابى ، كنت بفتكر إني خسرت ست كانت مستعدة تشيل عني الدنيا كلها، وأنا اللي خليتها في يوم تقرر تشيل نفسها من حياتي. وعرفت متأخر إن العدل مش إنك تدي كل واحدة وعد، ولا إنك تفضل ترضي دي على حساب دي، العدل إنك ماتظلمش حد علشان تريح نفسك، وإنك ماتعتبرش طيبة اللي قدامك ضعف، لأن أصعب خسارة مش إن حد يمشي من حياتك، أصعب خسارة إنك تكون إنت السبب، وتفضل طول عمرك فاكر إنك كنت تقدر تمنع ده، لو بس كنت قدرت تشوف غير نفسك.

مقالات ذات صلة

رواية كأس الغرام (كاملة حتى الفصل الاخير) بقلم منال عباس

🌾 المجنون الذي أبكي العقلاء 🌾

حمايا

جت تنظف مكان امها

روايه انا عاشق لها فارس وريم البارت الاول كامل بقلم الكاتبه نور محمد

اجـ,ـازة سـ,ـعيدة

اترك تعليقاً إلغاء الرد